Prezıdent tsıfrlyq ekonomıkany qalyptastyrý sharalary jóninde málimdedi
ASTANA. KAZINFORM — Qazaqstan halqyna Joldaýyn jarııalaý kezinde Prezıdent Qasym-Jomart Toqaev taýar óndirý jáne ótkizý úshin qosymsha tsıfrlyq quraldar kerek ekenin aıtty.
– Halyq ıgiligine baǵyttalǵan tsıfrlyq ekonomıkany qalyptastyrý úshin adamdardyń múmkindikteri olardyń turǵylyqty jerine táýeldi bolmaýy kerek. Aýylda da, qalada da turatyn azamattarymyz smartfondy zańdy tabys tabýdyń quraly retinde paıdalanýdy úırenýi tıis. Kásipkerlikti qoldaýdyń qoldanystaǵy memlekettik sharalaryn jekemenshik marketpleısterdiń, bankterdiń, logıstıkalyq kompanııalar men tsıfrlyq servısterdiń múmkindikterimen ushtastyrý qajet. Nesıe berý men sýbsıdııalaýdan bólek, taýar óndirý jáne ótkizý úshin qosymsha tsıfrlyq quraldar kerek, – dedi ol.
Prezıdenttiń sózinshe, keler jyly Úkimet bıznes-qoǵamdastyqpen birlesip, birqatar óńirde aýyl sharýashylyǵy ónimderin óndirýshilerge óz ónimderin ótkizý arnalaryn jolǵa qoıýǵa kómektesetin tsıfrlyq damý jónindegi pılottyq jobalardy iske qosýy qajet. Al sátti tájirıbelerdi barlyq óńirge taratý kerek.
– Aktıvterdi tokenızatsııalaý, ıaǵnı olardy tsıfrlyq ortaǵa kóshirý áleýetin tolyq paıdalaný qajet. Bul azamattarǵa kompanııalar men túrli nysandardyń ortaq ıesi bolýǵa, al kásipkerlerge artyq deldaldarsyz tikeleı kapıtal tartýǵa múmkindik beredi. Halyq ıgiligine baǵyttalǵan tsıfrlyq ekonomıkany qurýdyń strategııalyq maqsaty – zamanaýı tehnologııalardyń múmkindikterin árbir azamattyń ál-aýqatyn arttyrýǵa paıdalaný, – dedi Memleket basshysy.
Aıta keteıik, buǵan deıin Prezıdent mıkro jáne shaǵyn bıznesti tekserýge úsh jylǵa moratorıı engizý máselesin talqylaýdy usynǵanyn jazǵanbyz.
