Prezıdent tsıfrlandyrýdyń keıbir máseleleri týraly Jarlyqqa qol qoıdy
ASTANA. KAZINFORM – Memleket basshysy «Qazaqstan Respýblıkasyndaǵy tsıfrlandyrýdyń keıbir máseleleri týraly» Jarlyqqa qol qoıdy. Bul týraly Aqordanyń baspasóz qyzmeti habarlady.
Jarlyqqa sáıkes, 2026 jylǵy 1 qańtardan bastap memlekettik organdar men kvazımemlekettik sektor sýbektileriniń jańa aqparattandyrý obektilerin QazTech «elektrondyq úkimeti» aqparattyq-kommýnıkatsııalyq platformasynan tys qurýǵa moratorıı engiziledi.
Úkimetke memlekettik organdar men kvazımemlekettik sektor sýbektileriniń jańa aqparattandyrý obektilerin QazTech platformasynda ázirleý múmkin bolmaǵan kezde árbir naqty jaǵdaıdy Prezıdent janyndaǵy Qazaqstan Respýblıkasynda tsıfrlandyrýdy engizý máseleleri jónindegi komıssııanyń qaraýyna shyǵarý tapsyryldy.
Jarlyq mátini
Qazaqstan Respýblıkasyndaǵy tsıfrlandyrýdyń keıbir máseleleri týraly
Tsıfrlandyrýdyń platformalyq modeline kóshýdi qamtamasyz etý, memlekettik fýnktsııalardyń qaıtalanýyn bolǵyzbaý jáne bıýdjet shyǵystaryn ońtaılandyrý maqsatynda QAÝLY ETEMІN:
1. 2026 jylǵy 1 qańtardan bastap memlekettik organdar men kvazımemlekettik sektor sýbektileriniń jańa aqparattandyrý obektilerin «QazTech» «elektrondyq úkimet» aqparattyq-kommýnıkatsııalyq platformasynan (budan ári – «QazTech» platformasy) tys qurýǵa moratorıı engizilsin.
2. Qazaqstan Respýblıkasynyń Úkimeti memlekettik organdar men kvazımemlekettik sektor sýbektileriniń jańa aqparattandyrý obektilerin «QazTech» platformasynda ázirleý múmkin bolmaǵan kezde árbir naqty jaǵdaıdy Qazaqstan Respýblıkasy Prezıdentiniń janyndaǵy Qazaqstan Respýblıkasynda tsıfrlandyrýdy engizý máseleleri jónindegi komıssııanyń qaraýyna shyǵarýdy qamtamasyz etsin.
3. Qazaqstan Respýblıkasynyń Úkimeti, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar, jergilikti atqarýshy organdar men kvazımemlekettik sektor sýbektileri osy Jarlyqtan týyndaıtyn qajetti sharalardy qabyldasyn.
4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
5. Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń Prezıdenti Q.Toqaev
Astana, Aqorda, 2025 jylǵy 9 jeltoqsan
№ 1117
Aıta keteıik, Memleket basshysy Qasym-Jomart Toqaev aldaǵy eki aıda memlekettik organdardy tsıfrlandyrý men jasandy ıntellektini engizýge baılanysty naqty sharalar ázirleýdi tapsyrǵan edi. Osy ózgeristerdiń basty elementi – QazTech ulttyq tsıfrlyq platformasy boldy.
Buǵan deıin Prezıdent Qasym-Jomart Toqaev Aýyl sharýashylyǵy eńbekkerleriniń ekinshi forýmynda sóılegen sózinde aýyl sharýashylyǵyn tsıfrlandyrýdyń mańyzyn atap ótken edi.