Prezıdent: Tsıfrlandyrý men jasandy ıntellekt — el bolashaǵynyń negizi
ASTANA. KAZINFORM — Prezıdent Qasym-Jomart Toqaev Túrki memleketteri uıymynyń 13-sammıtinde tsıfrlandyrý men jasandy ıntellektini damytýdyń mańyzyn atap ótip, Qazaqstannyń osy baǵyttaǵy bastamalary men jetistikterine toqtaldy.
Memleket basshysynyń pikirinshe, tsıfrlandyrý jáne jasandy ıntellektini damytý — búgingi kúnniń talaby.
— Elderimiz jappaı tsıfrlandyrý máselesimen belsendi túrde aınalysyp jatyr. Qazaqstan tsıfrlyq el bolýdy maqsat etip otyr. Bul baǵytta aýqymdy jumys istelýde. Bıyl elimizde — Tsıfrlandyrý jáne jasandy ıntellekt jyly. Astanada Alem.ai jasandy ıntellekt ortalyǵy quryldy. Jasandy ıntellekt salasyna qajetti mamandar daıarlaıtyn Qazaq AI Research ýnıversıteti ashyldy. Qýattylyǵy 1 GıgaVatt bolatyn Derekterdi óńdeý ortalyqtarynyń alqaby qurylyp jatyr. Eki sýperkompıýter iske qosyldy. Taıaý arada úshinshi óte qýatty sýperkompıýter óz jumysyn bastaıdy. Tsıfrlyq kodeks, Jasandy ıntellekt týraly arnaıy zań qabyldandy. Qajet bolsa, osy tájirıbemizdi baýyrlas eldermen bólisýge daıynbyz. Ózderińizge jaqsy belgili, bıyl mamyr aıynda Túrkistanda ótken basqosýda jasandy ıntellekt jáne tsıfrlyq damý máselesin talqyladyq. Qazir sol jıynda kóterilgen birqatar mańyzdy bastamany júzege asyryp jatyrmyz. Budan bólek, jaqynda Qazaqstan men Ázerbaıjan arasynda Transkaspıı talshyqty-optıkalyq baılanys jelisi iske qosyldy. Osy biregeı jobanyń ıgiligin túrki memleketteri de kóre alady. Budan bólek, áli de jedel atqarylýǵa tıis jumystar az emes. Atap aıtqanda, Kıberqaýipsizdik keńesin, Tsıfrlyq monıtorıng jáne ınnovatsııalar ortalyqtaryn qurý bastamasyn júzege asyrýdy tezdetken jón. Bul jobalar elderimizdiń tsıfrlyq saladaǵy yntymaqtastyǵyn nyǵaıta túsetini sózsiz, — dedi Prezıdent.
Aıta keteıik, Ankarada Túrki memleketteri uıymynyń 13-sammıti ótip jatyr. Memleket basshysy Qasym-Jomart Toqaev sóz sóılep, yntymaqtastyqty nyǵaıtý jolynda «Túrki memleketteri uıymy +» formatyn qoldanýdyń mańyzy zor ekenine mán berdi.
