Prezıdent TRK jáne Úndistannyń habar taratý korporatsııasy seriktestikti damytady

ASTANA. KAZINFORM — Úndistannyń «Prasar Bharati» habar taratý korporatsııasynyń bas dırektory Gaýrav Dvıvedı bastaǵan delegatsııa QR Prezıdenti Teleradıokesheniniń keńsesine keldi.

Kezdesýge qatysýshylar Prezıdent TRK men «Prasar Bharati» arasyndaǵy kásibı baılanysty damytý boıynsha bolashaq yntymaqtastyqqa qatysty máselelerdi talqylady. Áńgimelesý barysynda Qazaqstan men Úndistan arasyndaǵy ózara týrıstik saparlardan bastap, memleket kóshbasshylarynyń qarym-qatynasyna deıingi barlyq deńgeıdegi ózara is-qımyl jaıy atap ótildi.

Ekijaqty qatynastardyń mańyzdy baǵyty — BAQ salasyndaǵy yntymaqtastyqty damytý boldy. Úndistannyń «Prasar Bharati» habar taratý korporatsııasynyń delegatsııasy Prezıdent TRK-in 2025 jyldyń mamyr aıynyń basynda Mýmbaıda ótetin aldaǵy Dúnıejúzilik aýdıovızýaldy jáne oıyn-saýyq tehnologııalary sammıtine (WAVES) qatysýǵa shaqyrdy. WAVES sammıti medıa ındýstrııa ókilderin biriktiretin Úndistannyń halyqaralyq seriktestikterdi nyǵaıtý bastamasy. Sammıt qatysýshylaryna medıa salasynyń zamanaýı syn-qaterlerin talqylaýǵa, ozyq tájirıbelermen almasýǵa jáne jańa iskerlik baılanystar ornatýǵa múmkindik beriledi.

QR Prezıdentiniń teleradıokesheni — quramyna Jibek Joly, Silk Way, Silk Way Cinema telearnalary, Qazaqstandaǵy eń kóne «QazAqparat» Halyqaralyq aqparat agenttigi jáne derekti kıno ortalyǵy kiretin Qazaqstannyń iri medıa kompanııalarynyń biri.

Prasar Bharati (Úndistannyń habar taratý korporatsııasy) — shtab-páteri Nıý-Delıde ornalasqan Úndistannyń memlekettik qoǵamdyq habar taratý kompanııasy. Parlament zańnamasyna sáıkes qurylǵan avtonomdy organ. Ol Doordarshan-habar taratý kompanııasynan jáne All India Radio — habar taratý kompanııasynan turady.

Osyǵan deıin Prezıdent TRK jýrnalısteri Al Jazeera medıa ınstıtýtynda taǵylymdamadan ótkenin jazǵan edik.