Prezıdent TRK jáne Al Jazeera seriktestigi: jańa joba jas jýrnalısterdi qanattandyrdy
ASTANA. KAZINFORM – Astanada ótip jatqan «Al Jazeera aptalyǵy» aıasynda Qatar telekompanııasynyń basshylary QR Prezıdenti teleradıokesheni ujymymen kezdesip, Qazaqstandaǵy eń iri medıaholdıngtiń qyzmetimen tanysty.
Sheteldik áriptesterge Prezıdent teleradıokesheni resýrstarynyń shyǵarmashylyq jáne tehnıkalyq múmkindikteri kórsetildi. Atap aıtqanda, «Jibek joly», «Silk Way» jáne «Silk Way Cinema» telearnalary, «Kazinform» HAA, derekti kıno ortalyǵy tanystyryldy.
Kezdesýge qatysýshylar QR Prezıdenti TRK jáne Al Jazeera Media Network uıymdastyrǵan MNU halyqaralyq jýrnalıstıka mektebindegi «Al Jazeera aptalyǵy» týraly pikir almasty.
Al Jazeera telekompanııasynyń basshysy, doktor Mostefa Sýag bul is-sharanyń mańyzdylyǵyn atap ótti. Shara barysynda Qatar telearnasynyń mamandary qazaqstandyq stýdentter men jýrnalısterge zamanaýı medıanyń ózekti máseleleri boıynsha bir aptalyq trenıng ótkizedi.
– Astanada ótkizilgen kúnder mańyzdy oqıǵalarǵa toly jáne jemisti boldy dep esepteımin. Trenıng joǵary deńgeıde uıymdastyrylǵan, qatysýshylar belsendilikterimen jáne bizdiń telekompanııanyń standarttary men stıline degen qyzyǵýshylyqtarymen tań qaldyrdy. Sizderde de jýrnalıstıka mektebiniń dástúri berik, álemdik úrdisterge ilesip jatqanyn kórip otyrmyz. Bul rette men elderińizdiń sulýlyǵyn jáne onyń týrızm salasyndaǵy zor áleýetin atap ótkim keledi, - dedi Mostefa Sýag.
Eske salsaq, Qazaqstan Prezıdenti Qasym-Jomart Toqaevtyń bıyl aqpanda Qatarǵa memlekettik sapary aıasynda Prezıdent teleradıokesheni men Al Jazeera arasynda yntymaqtastyq týraly memorandýmǵa qol qoıylǵan bolatyn.
- Teleradıokeshenimizdiń qatarlyq áriptestermen birlesken jobalary bilim berý jáne aqparat salasyndaǵy yntymaqtastyqty damytýǵa baǵyttalǵan. Bul bizdiń elderimizdiń aýdıtorııasyna aımaqtyq jańalyqtardy kóbirek bilýge, sondaı-aq jýrnalısterdiń medıa salasy trendteri men tendentsııalaryna sáıkes daıyndalýyn qamtamasyz etýge múmkindik beredi. «Al Jazeera-men bir apta» atty alǵashqy birlesken jobamyzdyń nátıjesi shabyttandyrmaı qoımaıdy. Yntymaqtastyǵymyzdyń kelesi kezeńi kontentti birlesip jasaý jáne almasý baǵytyndaǵy da jobalar bolmaq, - dep atap ótti Prezıdent TRK dırektory Raýshan Qajybaeva.
«Al Jazeera aptalyǵy» qatysýshylaryna «Jańalyqtar reportajy», «Derekter jýrnalıstıkasy», «Mobıldi jýrnalıstıka», «Tsıfrlyq storıtellıng» jáne «Jańalyqtar júrgizýshileriniń kýrstary» sııaqty taqyryptarda 100 saǵattan astam teorııalyq jáne praktıkalyq sabaqtar berildi.
Mundaı oqytý Qazaqstanda ǵana emes, Ortalyq Azııa aımaǵynda da júrgizilip jatyr. Dáris kýrsynyń sońynda stýdentter oqý baǵyttarynyń árqaısysy boıynsha kýrstyq jobalardy qorǵaıdy, sondaı-aq Al Jazeera Media Institute sertıfıkattaryn alady.
Aıta ketsek, QR Prezıdentiniń teleradıokesheni Qazaqstandaǵy iri medıa-kompanııalardyń biri, onyń quramyna Jibek Joly, Silk Way, Silk Way Cinema telearnalary, «Kazinform» halyqaralyq aqparattyq agenttigi, Derekti fılmder ortalyǵy kiredi.
Al Jazeera telekompanııasy 1996 jyly Qatar Ámiriniń buıryǵymen qurylǵan. Telekompanııa álemniń kóptegen elinde arab jáne aǵylshyn tilderinde habar taratady jáne 50-den astam sheteldik bıýrosy bar. Derekti fılmderi Al Jazeera Documentary arnasynda kórsetiledi.
Buǵan deıin Maqsut Narikbayev ýnıversıtetiniń Halyqaralyq jýrnalıstıka mektebinde «Al Jazeera Week» - «Al Jazeera aptalyǵy» saltanatty túrde ashylǵan bolatyn.