Prezıdent TRK Pákistannyń medıa naryǵyna shyǵady

ASTANA. KAZINFORM — 2026 jyldyń 4 aqpanynda Islamabadta Qazaqstan Respýblıkasynyń Prezıdenti Qasym-Jomart Toqaevtyń Pákistan Islam Respýblıkasyna memlekettik sapary barysynda QR Prezıdenti Teleradıokesheni men Pákistannyń ortalyq aqparat agenttigi «Associated Press of Pakistan» arasynda Ózara túsinistik jáne yntymaqtastyq týraly memorandýmǵa qol qoıyldy.

Qujatqa Prezıdent TRK dırektory Raýshan Qajybaeva men «Associated Press of Pakistan» Bas dırektory Muhammed Asım qol qoıdy.

Taraptar aqparat almasý, mańyzdy qoǵamdyq-saıası oqıǵalardy birlesip jarııalaý jáne jańalyq kontentin óndirýdegi kásibı tájirıbemen bólisý boıynsha yntymaqtastyq ornatýǵa kelisti.

Pákistannyń «Associated Press of Pakistan» agenttigimen yntymaqtastyq Prezıdent TRK úshin Ońtústik Azııa elderi arasynda aýdıtorııasy jóninen ekinshi orynda turǵan, halqy 250 mıllıonnan asatyn Pákistan naryǵyna jol ashady.

Prezıdent TRK halqynyń jalpy sany 2 mıllıardtan asatyn óńir elderiniń BAQ-pen kásibı baılanysyn keńeıtip, aqparattyq keńistiktegi qatysýyn júıeli túrde tereńdete beredi. 

Anyqtama úshin:

QR Prezıdentiniń Teleradıokesheni Qazaqstannyń eń iri tolyq qyzmet kórsetetin medıa kompanııasy, onyń quramyna «Jibek Joly» ulttyq telearnasy jáne attas radıostantsııa, Silk Way, Silk Way Cinema jáne Silk Way Prime halyqaralyq telearnalary, «QazAqparat» halyqaralyq aqparat agenttigi jáne Derekti kıno ortalyǵy kiredi.

«Associated Press of Pakistan» (APP) — 1947 jyldan beri jumys istep kele jatqan Pákistannyń memlekettik aqparat agenttigi. Agenttik jańalyqtardy aǵylshyn, arab, ýrdý jáne birqatar aımaqtyq tilde (sındhı, pýshtý jáne balýchı) shyǵarady jáne 40-tan astam jetekshi sheteldik aqparat agenttikterimen yntymaqtastyq ornatyp otyr.

Budan buryn habarlanǵandaı, Prezıdent TRK jýrnalısteri Al Jazeera medıa ınstıtýtynda taǵylymdamadan ótti.