Prezıdent TRK-nyń delegatsııasy Qytaıda ótken 13-shi jahandyq vıdeomedıa forýmyna qatysty
ASTANA.KAZINFORM - 2025 jyldyń 6 qarashasynda Sıan qalasynda 40 elden kelgen 300-den astam adamnyń basyn qosqan 13-shi jahandyq vıdeoemedıa forýmy ótti.
Forým barysynda jahandyq basqarýdaǵy BAQ-tyń róli, ortaq tıimdilik úshin konsensýs qalyptastyrýǵa qatysty máseleler talqylandy. Ásirese vıdeokontenttiń álemdik ındýstrııasy, tsıfrlyq platformalar men halyqaralyq medıayntymaqtastyqtyń damýyna erekshe nazar aýdaryldy.
Jibek Joly/Silk Way telearnasynyń basqarýshy dırektory Erkejan Kúntýǵan «Jahandyq Ońtústik BAQ dıalogy» sessııasynda sóz sóıledi. E.Kúntýǵan Silk Way telearnasymen CMG (China Media Group) birlesip júzege asyrylǵan «Silk Way Star» halyqaralyq jobasy týraly aıtty.
12 eldiń daryndary men telearnalaryn biriktirgen joba mádenı almasý men halyqtar arasyndaǵy dostyqty nyǵaıtýdyń, jalpy sátti medıayntymaqtastyqtyń úlgisi boldy.
- Bul – bizdiń óńirimizdi Jahandyq ońtústiktiń qarqyndy, ashyq jáne kreatıvti bóligi retinde usynatyn, Ortalyq Azııa elderiniń daýsy birigetin jańa alań, - dedi E.Kýntýǵan.
Ol sondaı-aq jahandyq tsıfrlandyrý men tehnologııalardyń qarqyndy damýy kezinde adamı ólshemdi saqtaýdyń mańyzdylyǵyn atap ótti.
Sıan medıaforýmy qorytyndy qujat qabyldaýmen aıaqtaldy.