Prezıdent «TransAltaı dıalogy» bastamasyna qoldaý bildirdi

ASTANA. KAZINFORM — Prezıdent kólik-tranzıt salasyndaǵy seriktestikti nyǵaıtýdy taǵy bir basymdyq retinde atady, dep habarlaıdy Aqordanyń baspasóz qyzmeti.

Memleket basshysy 150-den astam eldiń qoldaýyna ıe bolǵan «Bir beldeý, bir jol» megajobasynyń zor áleýetin atap ótti.

— Bul jahandyq bastama «Bir beldeý, bir jol» baǵyty boıynsha saýda-logıstıkalyq operatsııalardyń barlyq qatysýshysyna jyl saıyn 1,5 trıllıon dollarǵa deıin paıda ákele alady. Soltústik — Ońtústik jáne Shyǵys — Batys, sondaı-aq Transkaspıı halyqaralyq kólik dálizderiniń múmkindigi mol. «TransAltaı dıalogy» bastamasynyń júzege asyrylýyna úlken úmit artamyz. Atalǵan jobaǵa Qazaqstan, Reseı, Qytaı jáne Mońǵolııa elderi qosylyp, Eýrazııadaǵy «Altaı» aımaǵynyń jer kólemi, halyq sany, ekonomıkalyq qýaty sekildi biregeı áleýetin tıimdi paıdalana alady. Іri jobalar men josparlardy iske asyrý úshin memleketter arasyndaǵy kólik baılanysyn nyǵaıtyp, tranzıttik-tarıftik strategııaǵa saı keletin tásilderdi oılastyrýymyz kerek. Bul másele Aqtaý qalasynda qarasha aıynda ótetin Shanhaı yntymaqtastyq uıymynyń porttary men logıstıkalyq ortalyqtary basshylarynyń alǵashqy forýmyndaǵy kelissózder men pikirtalastarǵa arqaý bolýy múmkin, — dedi Prezıdent.

Osydan buryn Prezıdent Qazaqstan «úsh zulymdyqqa», ıaǵnı, terrorızmge, separatızmge jáne dinı ekstremızmge qarsy kúreste kúsh-jiger biriktirýdi óte ózekti sanaıtynyn aıtty.

Sonymen qatar Qazaqstan ShYU-nyń qaýipsizdik syn-qaterlerimen kúres jóninde tórt ortalyq qurý bastamasyn qoldaıdy.