Bul referendýmnyń elimiz úshin de, barlyq azamattarymyz úshin de mańyzy óte zor - Aıbek Dádebaı
ASTANA. KAZINFORM – Memleket basshysy Qasym-Jomart Toqaev jańa Konstıtýtsııamyzdyń basty avtory ekeni sózsiz. Bul týraly QR Prezıdenti Ákimshiliginiń Basshysy Aıbek Dádebaı aıtty.
- Jańa Konstıtýtsııany qabyldaý boıynsha referendýmǵa jalpy daıyndyq jumystary óte qarqyndy júrip jatyr deýge bolady. Bul referendýmnyń elimiz úshin de, barlyq azamattarymyz úshin de mańyzy óte zor. Sondyqtan barlyq quqyqtyq rásiminiń saqtalýy, zań talaptarynyń qatań oryndalýy óte ózekti bolyp tur. Bul rette Ortalyq referendým komıssııasynyń atqarar róli erekshe bolmaq. Al memlekettik organdardyń basty mindeti – daýys berý úshin qajetti ınfraqurylymmen qamtamasyz etý, saılaý ýchaskeleriniń jumysyn uıymdastyrý, onyń ishinde múmkindigi shekteýli azamattarǵa qajetti jaǵdaıdy jasaý, - dedi Aıbek Dádebaı.
Onyń aıtýynsha, Memleket basshysy jańa Konstıtýtsııa jobasynyń mátinimen jumysqa basa mán berdi.
- Ol úshin arnaıy ýaqyt bólip, barynsha belsendi atsalysty. Azamattardan, sarapshylyq qaýymdastyqtan, qoǵamdyq uıymdardan kelip túsken syndarly usynystardy jeke ózi oqyp, jiti zerdeledi. Odan soń keńesshilermen, sarapshylarmen birge negizgi zańnyń kirispesin, bólimderi men baptaryn jazýmen, ony óńdeýmen tyńǵylyqty túrde aınalysty. Jalpy Prezıdent sońǵy jarty jyl ishinde aptasyna keminde bir ret, keıde odan da jıi túrde áýeli Parlamenttik reforma boıynsha jumys tobynyń ókilderimen, jektekshilerimen, odan keıin Konstıtýtsııalyq komıssııanyń jetekshilerimen kezdesip otyrdy. Bul kezdesýler keıde bir saǵattan astam ýaqytqa sozylatyn. Osydan-aq biz jumystyń qandaı qarqynmen júrgenin ańǵara alamyz, - dedi ol.
Aıbek Dádebaı Prezıdent tyǵyz jumys kestesine qaramastan Konstıtýtsııa mátininiń jobasyn ázirleýge óte erekshe mán bergenin kópshilik buqaralyq aqparat quraldary arqyly kórip, bilip otyrǵanyn aıtady.
- Tipti túngi ýaqytta da Memleket basshymyz osy mátinmen jeke ózi jumys istegenin Prezıdent Ákimshiliginiń jaýapty qyzmetkerleri jaqsy biledi. Jalpy jańa Konstıtýtsııa jobasynyń mátininde Memleket basshysynyń saıası baǵdarynyń basty qaǵıdattary, qoǵam men memlekettiń damýyna qatysty kózqarasy, sondaı-aq ustanymdary keńinen kórinis tapqan. Sol sebepti, Qasym-Jomart Kemeluly jańa Konstıtýtsııamyzdyń basty avtory ekeni sózsiz, - dedi QR Prezıdenti Ákimshiliginiń Basshysy.
Osyǵan deıin Memlekettik keńesshi Erlan Qarın Jańa Ata zańdy «halyqtyq Konstıtýtsııa» dep aıtýǵa tolyq negiz bar ekenin aıtqan bolatyn.