Prezıdent tóraǵalyǵymen Úkimettiń keńeıtilgen otyrysy ótedi
ASTANA. KAZINFORM – Búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótedi.
Jıynda elimizdiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady. Premer-mınıstr Oljas Bektenovtiń, Ulttyq bank tóraǵasy Tımýr Súleımenovtiń, Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıevtiń, birqatar óńir ákimderiniń baıandamalary tyńdalady.
Esterińizge sala ketsek, buǵan deıingi Úkimet otyrysynda týrızmdi damytý máseleleri talqylanyp, 2026-2030 jyldarǵa arnalǵan «Qazaqstan balalary» tujyrymdamasy bekitilgen edi.
Birinshi másele boıynsha negizgi baıandamany Sport jáne týrızm mınıstri Erbol Myrzabosynov jasady. Onyń málimetinshe, 2025 jyly týrızm salasyna salynǵan ınvestıtsııa kólemi 32 paıyzǵa ósti. Bul – 1 trıllıon 254 mlrd teńge.
Mınıstrliktiń tiziminde júzege asyrylý josparlanǵan 328 ınvestıtsııalyq joba qamtylǵan. Negizgi jobalardyń qatarynda «Oı-Qaraǵaı» taý-shańǵy kýrorty, Hilton jáne Mandarin Oriental qonaq úı keshenderi, «Jibek joly» oıyn-saýyq kesheni, Keruen Inn jol boıyndaǵy servıstik obektiler jelisi bar. Atalǵan jobalardy iske asyrý týrızm salasynda shamamen 10 myń turaqty jumys ornyn qurýǵa múmkindik beredi.
Degenmen, mınıstr negizgi kórsetkishterdiń ósý úrdisine qaramastan, bul salada áli de birqatar sheshilmegen júıeli másele bar ekenin jasyrǵan joq.
- Aqmola, Qaraǵandy, Pavlodar, Abaı jáne Jetisý oblystaryndaǵy kýrorttyq aımaqtarda sýmen qamtamasyz etý jáne ortalyqtandyrylǵan káriz júıesi máseleleri áli de sheshilmegen. Sýdy, sonyń ishinde uńǵymalardy paıdalaný máselesine arnaıy nazar aýdarý qajet. Bul másele, ásirese, Alakól jaǵalaýynda asa ózekti bolyp tur. Alakól kóliniń eki bettegi jaǵalaýynda da jaǵany bekitý jumystaryn júrgizý qajet. Mysaly, Abaı oblysyndaǵy birqatar demalys bazalary qaýipti jerde, olarǵa sý tym jaqyndap qalǵan. Osyǵan baılanysty bul máseleni sheshýdi keıinge qaldyrýǵa bolmaıdy. Sonymen birge Kaspııdiń jáne Jetisý oblysyndaǵy Alakól jaǵajaı aımaqtarynda sýdyń túbin tereńdetý jumystaryn júrgizý kerek, - dedi ol.
Erbol Myrzabosynovtyń aıtýynsha, keıbir kýrorttar týrıster aǵynynyń kóbeıýine daıyn bolmaı jatyr. Býrabaı kýrorttyq aımaǵynda maýsymnyń qyzǵan shaǵynda keptelis bolady.
Al Balqash kóli baǵytynda jol boıyndaǵy qyzmet kórsetý obektileriniń jetispeıtini, janarmaıdyń tapshylyǵy, ıaǵnı janarmaı quıý stantsııalarynda saǵattap turatyn kezekter baıqalady. Barlyq derlik kýrorttyq aımaqta qatty turmystyq qaldyqtar polıgony joq deýge bolady.
- Keı jerlerde abattandyrýǵa qatysty uıymdastyrýshylyq sıpattaǵy máseleler de bar, dárethanalar men qoqys konteınerleriniń bolmaýy da osyǵan jatady. Jaǵajaı aımaqtary kóbinese jabdyqtalmaǵan jáne aımaqtarǵa bólinbegen, mundaı jaǵdaı barlyq óńirge qatysty bolyp tur. Óńirler bul máseleniń sheshilgeni jáne jalpy sany 60 sanıtarlyq-gıgıenalyq toraptyń ornatylǵany týraly esep berdi. Alaıda qaıta teksergen kezde olardyń kóbi jabyq boldy jáne jelilerge qosylmaǵan, - dedi mınıstr.
Al "Kazakh Tourism" AQ Basqarma tóraǵasy Talǵat Ǵazızov elimizdi halyqaralyq deńgeıde ilgeriletý jumystaryna toqtaldy. Onyń dereginshe, ótken jyly Qazaqstan 14 halyqaralyq týrıstik kórmede tanystyryldy. Barlyq óńir Kazakh Tourism-men tyǵyz áriptestikte jumys istedi. Osy jyly 12 halyqaralyq týrıstik kórmege qatysý josparlanyp otyr.
Budan bólek, Almaty qalasy Azııa men Taıaý Shyǵystaǵy maqsatty qalalarda, sonyń ishinde Mýmbaı, Dýbaı, Shanhaı, Seýl, Tokıo jáne Sıngapýrda 10 roýd-shoý ótkizýdi josparlap otyr.
- Bıyl álemdik juldyzdardyń qatysýymen birqatar iri kontserttik is-shara ótkizý josparlanyp otyr. Alǵashqy kontsertke Tımbalend, Nıkol Sherzınger, Basta Raıms jáne basqa da ártister qatysady, ol mamyr aıyna belgilengen. Jalpy jyl sońyna deıin keminde 5 iri kontserttik shara ótedi dep kútilýde, - dedi Talǵat Ǵazızov.
Talqylanǵan máseleni túıindegen Premer-mınıstr Oljas Bektenov Úkimet Apparaty týrıstik nysandardy júıeli túrde tekserip, jaǵdaıdy únemi qadaǵalap otyratynyn eskertti. Sonymen qatar jazǵy týrıstik maýsym bastalǵanǵa deıin mınıstrlik pen ákimdikter demalýshylarǵa qolaıly jaǵdaıdy qamtamasyz etý úshin barlyq qajetti sharalardy qabyldaý tıistigin aıtty.
Osy oraıda Úkimet basshysy Týrızm mınıstrligi, Mádenıet mınıstrligi, «Kazakh Tourism» kompanııasy jáne ákimdikterge birge bir aı merzimde Qazaqstandaǵy barlyq mádenı, sporttyq jáne basqa da buqaralyq is-sharalardy eskere otyryp, 2026 jylǵa arnalǵan egjeı-tegjeıli jumys josparyn ázirleýdi, Ekologııa mınıstrligine kásipkerler palatasymen birlesip, tıisti zańnamalyq túzetýler ázirleýdi tapsyrdy.
- Bıznes ókilderi ınvestıtsııalyq jobalardy iske asyrý kezinde sý aıdyndarynyń jaǵalaýyndaǵy qorǵaý aımaqtaryna qoıylǵan shekteýlerge nemese kirýge tyıym salynýyna baılanysty qıyndyqtarǵa tap bolady. Mysaly, akvapark qurylysyna qajetti ınfraqurylym júrgizý múmkin emes. Bul máselede barlyq tarapqa qolaıly bolatyn sheshim izdegen jón. Sý resýrstary mınıstrligi ozyq halyqaralyq tájirıbeni zerttep, tıisti zańnamalyq túzetýlerdi ázirleýi qajet, - dedi Oljas Bektenov.
Otyrystyń kún tártibine shyǵarylǵan ekinshi másele boıynsha Oqý-aǵratý mınıstri Juldyz Súleımenova negizgi baıandama jasady.
- Memleketimiz qabyldaǵan júıeli sharalar jáne qol jetkizilgen nátıjeler «Qazaqstan balalary» biryńǵaı tujyrymdamasyna negiz boldy. Tujyrymdama balalardyń quqyǵyn qorǵaýdyń birizdiligin jáne sharalardyń tıimdiligin arttyrady. Balalardyń negizgi quqyqtaryn qamtıtyn tórt baǵyttan turady. Olar: balalardyń qaýipsizdigi, bilim, densaýlyq, otbasyǵa jáne áleýmettik qorǵaýdaǵy quqyqtary, - dedi ol.
Mınıstrdiń aıtýynsha, tıimdilikti baǵalaý úshin 10 ındıkator qarastyrylǵan, naqty iske asyrý úshin 158 is-shara josparlanǵan. Mektepterde pedagog-psıholog saǵatyn engizý, zorlyq-zombylyqqa ushyraǵan balalarǵa 40 kómek kabınetin ashý kózdelip otyr. Qarjylandyrýdyń jalpy kólemi 1,3 trln teńge.
Densaýlyq saqtaý mınıstri Aqmaral Álnazarovanyń aıtýynsha, buryn tek eresekterge jasalyp kelgen «gamma-pyshaq» apparatyndaǵy radıohırýrgııalyq operatsııalar endi balalarǵa da júrgizile bastady.
Jyl saıyn orta eseppen 700 shala týǵan nárestege retınopatııany túzetý júrgiziledi. 2 myńnan astam balaǵa kardıohırýrgııalyq operatsııalar jasalyp, júrek aqaýlary der kezinde túzetilip otyrady. Sońǵy úsh jylda shetelge týys emes donordan baǵanaly jasýshalardy transplantatsııalaýǵa balalardy jiberý 3 ese, al kardıohırýrgııalyq emge joldaý 5,2 ese qysqardy jáne de bul qadamdar balalar arasyndaǵy múgedektik deńgeıin 11 paıyzǵa tómendetýge múmkindik berdi. Bıyl elimizde protondyq, ıodterapııa jáne tamyrly aqaýlardy emdeý tolyq qoljetimdi bolady.
Otyrysty qorytyndylaǵan Úkimet basshysy 1 aqpannan bastap barlyq bilim berý uıymyna «tosynnan tekserý» qaǵıdaty boıynsha erekshe baqylaý men qadaǵalaý júıesi engiziletinin aıtty. Bul balalardy saýyqtyrý, olardyń qaýipsizdigi men tamaqtaný máselelerine qatysty.
- Densaýlyq saqtaý, Oqý-aǵartý, Mádenıet, Eńbek jáne áleýmettik qorǵaý, Týrızm jáne Іshki ister mınıstrlikterine ákimdiktermen birlesip, osy jyldyń 30 qańtaryna deıin erekshe baqylaý men qadaǵalaýǵa jatatyn nysandar tizilimin daıyndaýdy tapsyramyn,- dedi ol.
Sonymen qatar Oljas Bektenov Oqý-aǵartý mınıstrligine Mádenıet jáne aqparat mınıstrligimen birlesip, «Qazaqstan balalary» tujyrymdamasyn iske asyrý boıynsha aqparattyq naýqandy uıymdastyryp, josparlanǵan is-sharalar men olardyń oryndalýy týraly halyqty ashyq ári túsinikti jolmen habardar etip otyrýdy tapsyrdy.