Prezıdent tóraǵalyǵymen Sheteldik ınvestorlar keńesiniń 36-shy plenarlyq otyrysy bastaldy
ASTANA. KAZINFORM – Elordadaǵy Táýelsizdik saraıynda Memleket basshysy Qasym-Jomart Toqaevtyń tóraǵalyǵymen QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysy bastaldy.
Aıta keteıik, buǵan deıingi 35-shi otyrys ekonomıkanyń tsıfrlyq tranformatsııasy taqyrybynda ótken edi. Sol jıynda Prezıdent geosaıası shıelenis pen protektsıonızmniń qarqyn alýy álemdik ekonomıkany ózgeriske ushyratyp jatqanyn atap ótip, kez kelgen daǵdarys jańa múmkindikterge jol ashatynyna nazar aýdardy.
«Orasan zor tehnologııalyq serpin beretin „tsıfrlandyrý“ osyndaı múmkindiktiń biri dep sanaımyz. Tsıfrlandyrý qarqyny ekonomıkanyń damýyna zor yqpal etip, búgingi kún tártibiniń baǵyt-baǵdaryn aıqyndap berdi. Jasandy ıntellekt, blokcheın, Internet zattar (IoT) jáne Úlken derekter (Big Data) sekildi jańa tujyrymdar men tehnologııalardy keń kólemde engizý aýyl sharýashylyǵynan bastap qarjy salasyna deıin barlyq saladaǵy oıyn erejesiniń ózgerýine alyp keledi. Tsıfrlandyrý tutas elder men óńirlerdiń básekege qabilettiligin anyqtaýshy faktorǵa aınaldy. 2025 jylǵa qaraı álemdegi tsıfrlyq naryq 50 paıyzǵa artyp, 6,8 trıllıon dollarǵa jetedi dep boljanyp otyr. Boljam boıynsha 10 jylda álemdegi taýar óndirisi men kórsetiletin qyzmetterdiń 70 paıyzynda tsıfrlyq tehnologııalar qoldanylady. Bul úrdistiń Qazaqstan úshin asa mańyzdy ekenin anyq túsinemiz», — degen edi Memleket basshysy.
Sheteldik ınvestorlar keńesi Qazaqstan Respýblıkasy Prezıdentiniń janyndaǵy konsýltatıvtik-keńesshi organ sanalady. Keńestiń qyzmetin qamtamasyz etýdi Qazaqstan Respýblıkasy Prezıdentiniń Ákimshiligi men Keńestiń jumys organy júzege asyrady.
Keńestiń negizgi mindetteri:
Qazaqstan Respýblıkasynyń ınvestıtsııalyq saıasatynyń negizgi baǵyttaryn aıqyndaý;
Qazaqstan Respýblıkasyndaǵy ınvestıtsııalyq ahýaldy jaqsartý;
Qazaqstan Respýblıkasynyń ınvestıtsııalar týraly normatıvtik quqyqtyq bazasyn jetildirý;
Qazaqstan Respýblıkasynyń ekonomıkasyn ártaraptandyrýǵa, ónerkásiptik sektoryn ındýstrııalandyrýǵa, shaǵyn jáne orta bıznesin damytýǵa sheteldik kompanııalardyń járdemdesýi;
Qazaqstan Respýblıkasynyń ekonomıkasyn álemdik ekonomıkalyq protsesterge ıntegratsııalaý;
Qazaqstan Respýblıkasynyń ekonomıkasyna sheteldik ınvestıtsııalardy tartý strategııasy;
Qazaqstan Respýblıkasynyń halyqaralyq mańyzy bar iri ınvestıtsııalyq baǵdarlamalary men jobalaryn iske asyrý máseleleri boıynsha usynymdar men usynystar ázirleý.
Aıta keteıik, Memleket basshysy Qasym-Jomart Toqaevtyń 2024 jylǵy 1 qazandaǵy № 174 ókimimen Qazaqstan Respýblıkasy Prezıdentiniń janyndaǵy sheteldik ınvestorlar keńesiniń jeke quramy bekitilgen edi.
