Prezıdent tóraǵalyǵymen Ǵylym jáne tehnologııalar jónindegi ulttyq keńestiń otyrysy ótip jatyr

ASTANA. KAZINFORM - Aqordada Prezıdent Qasym-Jomart Toqaevtyń tóraǵalyǵymen Ǵylym jáne tehnologııalar jónindegi ulttyq keńestiń otyrysy ótip jatyr. Jıynda sóz sóılegen Memleket basshysy bul kún qazirgi qazaq ǵylymynyń atasy Qanysh Sátbaevyń ómirge kelgen kúni ekenin atap ótti. 

«Aldymen, barshańyzdy Ǵylym kúnimen shyn júrekten quttyqtaımyn! Sizder arqyly Qazaqstan ǵalymdaryna jyly lebizimdi jetkizgim keledi. Shyn máninde, búgingi merekelik kún – qoǵamymyzdaǵy erekshe sát, sebebi bul kún ǵulama ǵalym, zańǵar tulǵa Qanysh Sátbaevtyń týǵan kúnimen tuspa-tus kelip otyr. Dál búgin akademık Qanysh Sátbaevtyń týǵanyna 125 jyl toldy. Biz Uly Abaıdy qazaq rýhanııatynyń temirqazyǵy, Ahmet Baıtursynulyn Ult ustazy deımiz. Al Qanysh Sátbaevty qazirgi qazaq ǵylymynyń atasy deýge bolady.

Ózderińiz bilesizder, Qanysh Imantaıuly Sátbaev – halqymyzdyń birtýar perzenti. Elimiz áli kúnge deıin onyń ǵylymı jańalyqtarynyń ıgiligin kórip otyr. Áıgili ǵalymnyń mereıtoıyn joǵary deńgeıde atap ótý mańyzdy. 

Meniń tapsyrmammen kóptegen is-shara ótkiziledi. Biz, bir jaǵynan, uly ǵalymǵa shynaıy qurmet kórsetemiz. Ekinshi jaǵynan, bilim-ǵylym kýltin qalyptastyrý jolynda mańyzdy qadam jasaımyz. Eń bastysy, elimiz Sátbaev salǵan sara joldy jalǵastyrýy qajet.

Biz «ǵylym» týraly sóz qozǵaǵanda, eń aldymen, uly ǵalym Qanysh Sátbaevtyń esimi oıǵa oralady. Bul – zańdylyq. Memlekettik mártebesin qaıta ıelengen Ulttyq ǵylym akademııasy elimiz ǵana emes, búkil álemniń ǵylymı qaýymdastyǵy maqtan tutatyn Qanysh Sátbaevtyń esimimen tyǵyz baılanysty. Bul kezdeısoqtyq emes»", - dedi Memleket basshysy.