Prezıdent Tokıonyń Tótenshe jaǵdaılar jónindegi ahýaldyq ortalyǵyn aralap kórdi

ASTANA. KAZINFORM – Aqorda Prezıdent Qasym-Jomart Toqaevtyń Tokıonyń Tótenshe jaǵdaılar jónindegi ahýaldyq ortalyǵyn aralap kórgenin málimdedi.

Bul azamattyq qorǵanys pen qaladaǵy qaýip-qaterlerdiń aldyn alýdyń negizgi júıesi sanalady.

- Ortalyqtyń basty mindeti – qaladaǵy ahýalǵa udaıy monıtorıng júrgizý, tótenshe jaǵdaı kezinde bılik organdarynyń is-áreketin úılestirý, yqtımal qater men oryn alǵan apattar (jer silkinisi, taıfýn, sý tasqyny, iri tehnogendik apattar, lańkestik aktiler) týraly aqparattardy taldaý, - delingen aqparatta.

BAQ pen áleýmettik jelilerdegi jalǵan aqparattyń taralýyna qarsy is-qımylǵa basa kóńil bólinedi. Bul jumyspen táýlik boıy monıtorıng júrgizetin arnaıy bólimshe shuǵyldanady.

Al kúndelikti ómirde keshen daǵdarys jaǵdaılaryn basqarý júıelerin josparlaý jáne jetildirý, azamattyq qorǵanystyń óńirlik josparyn ázirleý, oqý-jattyǵý jıyndaryn daıyndaý jáne ótkizý, halyqty qulaqtandyrýǵa, apattardyń saldaryn joıýǵa arnalǵan aqparattyq júıelerdi damytý isimen aınalysady.

Aıta keteıik, Astana ákimi men Tokıo gýbernatory ózara túsinistik týraly memorandýmǵa qol qoıdy.