Prezıdent Toqaevtyń dostyqty baǵalaýy kóp nárseni ańǵartady – Sıngapýr Elshisi

ASTANA. KAZINFORM – Sıngapýrdyń Qazaqstandaǵy Elshisi Zýlkıflı bın Baharýdın Silk Way telearnasyna eksklıýzıvti suhbat berip, QR Prezıdentiniń Sıngapýrǵa resmı saparynan ne kútetini týraly oıymen bólisti. 

Aıtýynsha, bul sapar eki el arasyndaǵy seriktestikti nyǵaıta túsýge jańa múmkindikter ashady.

«Meniń oıymsha, eki el arasyndaǵy qarym-qatynastyń artyqshylyǵy men biregeıligi, Prezıdent Toqaevtyń bizdiń elimizdi jaqsy biletindigine baılanysty. Jas kezinde ol osynda jaqyn jerde turdy. Dostarynyń birqatary áli de osy aımaqta turady jáne kezdesýdi kútip júr. Prezıdent myrza da olardy esinen shyǵarmaǵan. Ol kisiniń bul jer týraly jyly estelikteri bar dep oılaımyn. Ómiriniń biraz bóligin osynda ótkizdi jáne bul qalyptasý jyldary edi dep aıtýymyzǵa bolady. Sıngapýrdyń burynǵy jáne jýyrda kezdesýi josparlanǵan qazirgi kóshbasshylarymen baılanysy berik. Sondyqtan, muny Prezıdent Toqaevtyń dostyqty qalaı qatty baǵalaıtynynyń birden-bir kórsetkishi dep esepteımin. Bul onyń minezi men tulǵalyq qasıetterine qatysty kóp nárseni ańǵartady. Ol tek memlekettik deńgeıde ǵana emes, jeke ómirde de dostyq baılanysyn úzgen emes. Bul sapar resmı qarym-qatynasty ózara túsinistik pen turaqty damýǵa negizdelgen jańa deńgeıge kóteredi degen úmit bar», - dedi Elshi áńgime barysynda.

Aıta ketsek, Memleket basshysy Qasym-Jomart Toqaev 23-24 mamyr kúnderi Prezıdent Tarman Shanmýgaratnamnyń shaqyrýymen Sıngapýr Respýblıkasyna memlekettik saparmen barady. Sapar aıasynda Sıngapýrdyń joǵary basshylyǵymen, halyqaralyq iri kompanııalardyń jetekshilerimen birqatar kezdesý ótkizedi jáne Qazaqstan-Sıngapýr bıznes forýmynyń jumysyna qatysady dep josparlanyp otyr.