Prezıdent Toqaevqa parlamenttik reformanyń aralyq nátıjeleri baıandaldy

ASTANA. KAZINFORM — Qasym-Jomart Toqaev Memlekettik keńesshi — Parlamenttik reforma jónindegi jumys tobynyń jetekshisi Erlan Qarındi qabyldady, dep habarlaıdy Aqordanyń baspasóz qyzmeti.

Prezıdentke Parlamenttik reforma jónindegi jumys toby qyzmetiniń aralyq nátıjeleri týraly esepe berildi.

Erlan Qarınniń aıtýynsha, e-Otinish memlekettik platformasy men Egov servısinde «Parlamenttik reforma» arnaıy bólimi iske qosylǵaly beri bir aıdyń ishinde azamattar men qoǵam belsendileri tarapynan osy máselege qatysty 300-ge jýyq usynys kelip tústi.

Budan bólek, 6 saıası partııa, atap aıtqanda, «Amanat», «Aýyl», «Aq jol», «Respublica», Qazaqstan Halyq partııasy jáne Jalpyulttyq sotsıal-demokratııalyq partııasy óz usynystaryn joldady. Onda bir palataly parlamenttiń qyzmeti men parlamenttik partııalardyń ókilettigine qatysty tetikter qamtylǵan.

Sonymen qatar Parlamenttik reforma jónindegi jumys tobynyń músheleri sarapshylyq materıaldar ázirledi. Qazir barlyq usynysty taldaý jáne júıeleý isi qolǵa alyndy. Jumys tobynyń ekinshi otyrysyn bıyl 2 jeltoqsanda ótkizý josparlanǵan. Jıynda usynystar jekelegen baǵyttar boıynsha jan-jaqty qarastyrylady.

— Memleket basshysy eldegi saıası jańǵyrýdyń jańa kezeńi bolatyn aldaǵy parlamenttik reformanyń mán-mańyzyna toqtaldy. Qasym-Jomart Toqaev kelip túsken barlyq bastamany jan-jaqty qarap, olardyń negizinde parlamenttik júıeni jańǵyrtý boıynsha naqty usynymdar ázirleýdi tapsyrdy, — delingen habarlamada.

Budan buryn Qasym-Jomart Toqaev Haısam ben Tarıq Ál Saıd pen onyń otandastaryn sultandyqtyń Ulttyq kúnimen quttyqtady.