Prezıdent Toqaevqa Almaty aglomeratsııasyn damytý jospary tanystyryldy

ASTANA. KAZINFORM — Memleket basshysy Almaty oblysynyń ákimi Marat Sultanǵazıevti qabyldady, dep habarlaıdy Aqordanyń baspasóz qyzmeti.

Qasym-Jomart Toqaevqa óńirdiń negizgi áleýmettik-ekonomıkalyq kórsetkishteri, sondaı-aq Almaty aglomeratsııasyn damytý jospary jóninde baıandaldy.

Marat Sultanǵazıev sońǵy 3 jylda oblystyń jalpy óńirlik ónimi 1,8 ese artyp, 3,4 trıllıon teńgeden 6 trıllıon teńgege óskenin aıtty. Bıylǵy qańtar — qazan aılary aralyǵyndaǵy qysqa merzimdi ekonomıkalyq ındıkator 109,7 paıyzdy qurady. Halyqaralyq kompanııalardyń qatysýymen taǵam ónerkásibi, logıstıka jáne metallýrgııa salalarynda jalpy somasy 470 mıllıard teńgeden asatyn 13 ınvestıtsııalyq joba iske asyrylyp jatyr.

Prezıdentke bıylǵy toǵyz aıda óńdeý ónerkásibiniń eksporty 28,5 paıyz ulǵaıyp, 618,5 mıllıon dollarǵa jetkeni jóninde málimet berildi. Bul rette eksporttyń 90 paıyzy joǵary deńgeıde qaıta óńdelgen ónimge tıesili.

Memleket basshysyna Almaty oblysy aýyl sharýashylyǵyna arnalǵan memlekettik sýbsıdııalardy tıimdi paıdalanatyn jetekshi óńirlerdiń biri ekeni aıtyldy: ıaǵnı bir teńge sýbsıdııaǵa 17 teńgege deıin aýyl sharýashylyǵy ónimi óndiriledi. Taýarly sút fermalarynyń sany 11-ge deıin kóbeıdi.

Qasym-Jomart Toqaevqa oblystyń áleýmettik damýy týraly aqparat usynyldy. Bıylǵy on aıda 950 myń sharshy metrge jýyq turǵyn úı salynǵan. Úsh aýysymdy mektepter sany 52-den 28-ge deıin qysqardy.

— Sonymen qatar Prezıdentke Qapshaǵaı sý qoımasy men ulttyq tabıǵı parkter aınalasyndaǵy týrızm klasteriniń damý barysy tanystyryldy. Oblysqa kelgen týrıster sany 2,2 mıllıon adamǵa jetken. Bul byltyrǵy osyndaı kezeńmen salystyrǵanda 36 paıyzǵa artyq. Kezdesý sońynda Memleket basshysy oblys ákimine óńirdiń ónerkásip jáne agrarlyq áleýetin nyǵaıtý, logıstıka, týrızm salalaryn damytý, sondaı-aq turǵyndardy tolǵandyratyn ózekti máselelerdi keshendi túrde sheshý jóninde birqatar naqty tapsyrma berdi, — delingen habarlamada.

Budan buryn Qasym-Jomart Toqaev Nıkýshor Dandy Rýmynııanyń ulttyq merekesimen quttyqtady.