Prezıdent Toqaev pen Korol ІІ Abdalla shaǵyn quramda kelissóz júrgizdi

ASTANA. KAZINFORM — Memleket basshysy Qasym-Jomart Toqaev pen Korol ІІ Abdalla shaǵyn quramda kelissóz júrgizdi, dep habarlaıdy Aqordanyń baspasóz qyzmeti.

Qazaqstan Prezıdenti Astanaǵa shaqyrýyn qabyl alǵany úshin Korolge alǵys aıtyp, jyl basynda Ammanǵa jasaǵan saparyn yqylaspen eske aldy.

— Uly Mártebeli, Qazaqstanǵa qosh keldińiz! Sizdiń resmı saparyńyz biz úshin zor mártebe. Bul Sizdiń elimizge alǵashqy kelýińiz emes. Qazaqstannyń qazirgi órkendeý jolyna jiti kóńil bólip otyrasyz. Ekijaqty kún tártibinde júzege asyrylýǵa tıis birqatar másele bar. Keshe eki el arasyndaǵy qarym-qatynastarǵa, sondaı-aq halyqaralyq kún tártibine qatysty mazmundy áńgime órbittik. Sizdiń jahandaǵy jaǵdaıdy jetik túsinetinińizge óte rızamyn. Búgin de pikir almasýdy jalǵastyrýǵa múmkindigimiz mol. Iordanııa men Qazaqstan arasyndaǵy ekijaqty yntymaqtastyq tabysty damyp keledi. Degenmen tıisti deńgeıde talqylaýdy qajet etetin máseleler de joq emes, — dedi Prezıdent.

ІІ Abdalla ekijaqty qarym-qatynasty odan ári nyǵaıtýdyń mańyzyn atap ótip, saýda-ekonomıkalyq yntymaqtastyqty arttyrýǵa daıyn ekenin rastady.

— Joǵary Mártebeli, qymbatty baýyrym, jyly sózińizge jáne qurmet kórsetip qabyldaǵanyńyzǵa alǵys aıtamyn. Bul sapar Sizdiń osydan birneshe aı buryn meniń elime jasaǵan tabysty saparyńyzdyń jalǵasy ispetti. Qazaqstan maǵan óte jaqyn. Munda kelgen saıyn Sizdiń basshylyǵyńyzben elińiz júıeli túrde ósip-órkendep kele jatqanyna kýá bolyp, tańǵalamyn. Ózińiz atap ótkendeı, keshe eki el arasyndaǵy yntymaqtastyqty túrli salada damytý boıynsha pikir almastyq. Meniń búgingi saparym Qazaqstan men Iordanııa arasyndaǵy berik dostyqqa qurylǵan tarıhtyń jańa paraǵyn ashatynyna senimdimin, — dedi Iordanııa Koroli.

Osydan buryn Prezıdent Qasym-Jomart Toqaev Aqorda rezıdentsııasynda elimizge resmı saparmen kelgen Iordanııa Koroli II Abdalla ben ál-Hýseındi qarsy alǵanyn jazǵan edik.