Prezıdent Toqaev Lı Kaı Fýmen jasandy ıntellekt salasyndaǵy yntymaqtastyqty talqylady

ASTANA. KAZINFORM — Memleket basshysy Sinovation Ventures jáne 01ai kompanııalarynyń bas dırektory Lı Kaı Fýdy qabyldady, dep habarlaıdy Aqordanyń baspasóz qyzmeti.

Kezdesý barysynda jasandy ıntellekt, tsıfrlyq transformatsııa, venchýrlyq ınvestıtsııa, startaptar ekojúıesiniń básekege qabilettiligin arttyrý jáne jahandyq tehnologııalyq seriktesterdi tartý salalaryndaǵy yntymaqtastyq máseleleri talqylandy.

— Qasym-Jomart Toqaev Jasandy ıntellektini damytý jónindegi keńes jumysyna jáne Digital Bridge 2025 forýmy aıasyndaǵy is-sharalarǵa belsendi qatysqany úshin Lı Kaı Fýǵa alǵys aıtty. Prezıdentke qazaqstandyq tarap pen 01ai kompanııasynyń AlemLLM tildik modelin birlesip iske qosqany, sondaı-aq jasandy ıntellekt ekojúıesin damytý maqsatyndaǵy yntymaqtastyqtyń basqa da perspektıvti baǵyttary jóninde aqparat berildi, — delingen habarlamada.

Budan buryn Sinovation Ventures kompanııasynyń bas dırektory, jasandy ıntellekt salasynyń tanymal sarapshysy Lı Kaı Fý 1 qazan kúni Kazinform agenttigine suhbat berdi. Áńgime barysynda ol jasandy ıntellektini memlekettik basqarýda paıdalaný tájirıbesi, Qytaı úlgisiniń ereksheligi jáne Qazaqstan úshin yqtımal damý joldary týraly aıtyp berdi.