Prezıdent TMU elderiniń Joǵarǵy sot tóraǵalaryna Qazaqstandaǵy reformalardy tanystyrdy
ASTANA. KAZINFORM – Qasym-Jomart Túrki memleketteri uıymyna múshe elderdiń Joǵarǵy sot tóraǵalarymen kezdesti Toqaev baýyrlas elderdiń ókilderine sońǵy jyldary memleketimizde júzege asyrylyp jatqan aýqymdy reformalar jóninde málimet berdi, dep habarlaıdy Aqordanyń baspasóz qyzmeti.
– Kóp uzamaı, ıaǵnı, birinshi shilde kúni Qazaqstannyń jańa Ata zańy kúshine enedi. Konstıtýtsııa – memlekettigimizdiń myzǵymas tiregi. Bas qujatqa sáıkes elimizdiń egemendigin, táýelsizdigin jáne jerimizdiń tutastyǵyn qorǵaý negizgi konstıtýtsııalyq mindet sanalady. Azamattardyń quqyqtary men bostandyqtaryn saqtaý, zań ústemdigin qamtamasyz etý, sondaı-aq árdaıym beıbitshilikke umtylyp, barlyq elmen dostyq qarym-qatynas ornatý memleketimizdiń myzǵymas qaǵıdaty retinde aıqyndaldy. Jańa sıpatqa ıe bolǵan Konstıtýtsııada adam kapıtalyn, bilim men ǵylymdy, ınnovatsııany damytý elimizdiń strategııalyq baǵyty dep tanyldy. Ata zańymyzda alǵash ret azamattardyń derbes derekterin, sonyń ishinde tsıfrlyq keńistiktegi jeke málimetterin qorǵaý týraly norma kórinis tapty. Buǵan qosa advokatýra týraly arnaıy bap qosyldy. Konstıtýtsııa erejelerin júzege asyrý maqsatynda jaqynda bes konstıtýtsııalyq zańǵa qol qoıyldy. Buǵan qosa, 70-ten astam Kodeks pen Zańǵa túzetýler engizildi. Tamyz aıynda elimizde Quryltaı saılaýy ótedi. Qazaqstan Halyq Keńesiniń quramy jasaqtalady. Jalpy, memlekettik basqarý júıesi tolyq jańǵyrtylady, – dedi Prezıdent.
Sonymen qatar Memleket basshysy sot jáne quqyq qorǵaý salasyn reformalaý boıynsha atqarylǵan aýqymdy jumysqa toqtaldy.
Osyǵan deıin Prezıdent Túrki memleketteri uıymyna múshe elderdiń Joǵarǵy sot tóraǵalarymen kezdeskeni týraly jazdyq.
