Prezıdent TMU elderine Astanaǵa erekshe mártebe bergeni úshin alǵys aıtty

Memleket basshysy Qasym-Jomart Toqaev Astanada ótip jatqan Túrki memleketteri uıymynyń H sammıtinde uıym múshelerin Astanaǵa túrki áleminiń Qarjy ortalyǵy mártebesin bergeni úshin alǵys aıtty, dep habarlaıdy Kazinform agenttigi.

«Aımaqtar arasynda saýda-sattyqty keńeıtip, ekonomıkaǵa qarjy quıýǵa basa mán bergen jón. Bul iste Túrki ınvestıtsııalyq qory erekshe ról atqarady. Turaqty ekonomıkalyq baılanystardy nyǵaıtý úshin jasyl qarjy naryǵyn damytý qajet», - dedi Memleket basshysy.

Prezıdent Qazaqstannyń «Túrki jasyl qarjy keńesin» qurýdy usynǵanyn eske saldy.

«Osy usynysty júzege asyrý úshin aýqymdy jumys atqaryldy. Búgin tıisti qujatqa qol qoıylmaq.

Astana qalasyna Túrki áleminiń Qarjy ortalyǵy mártebesin berý týraly bastama qoldaýǵa ıe boldy. Sizderge shynaıy alǵysymdy aıtamyn», - dedi Memleket basshysy.

Eske salaıyq, búgin Astanada Túrki memleketteri uıymynyń H sammıti ótip jatyr.

Jıynǵa Túrkııa, Ázerbaıjan, Ózbekstan, Qyrǵyzstan prezıdentteri uıymǵa múshe memleket basshylary retinde, Majarstan Premer-mınıstri men Túrikmenstan basshysy baqylaýshy eldiń basshylary retinde qatysady.

TMU sammıti «Túrki dáýiri» uranymen ótedi.

Búgin Syrtqy ister mınıstrliginde Túrki memleketteri uıymynyń syrtqy ister mıınstrleri keńesiniń jabyq otyrysy ótti.

Sharada QR Syrtqy ister mınıstri Murat Nurtileý Izraıl-HAMAS qaqtyǵysyndaǵy Qazaqstan ustanymyn aıtty.