Prezıdent TMD elderiniń adamdardy izdestirý shartyna qatysty zańǵa qol qoıdy
ASTANA. KAZINFORM – Memleket basshysy «2010 jylǵy 10 jeltoqsandaǵy Táýelsiz Memleketter Dostastyǵyna qatysýshy memleketterdiń adamdardy memleketaralyq izdestirý týraly shartyna ózgerister engizý týraly hattamany ratıfıkatsııalaý týraly» Qazaqstan Respýblıkasynyń Zańyna qol qoıdy.
Bul týraly Aqordanyń baspasóz qyzmeti habarlady.
Іshki ister mınıstriniń orynbasary Sanjar Ádilovtiń aıtýynsha, hattamamen shartqa TMD memleketteriniń quzyretti organdary arasynda elektrondyq formatta aqparat almasýdy reglamentteıtin ózgerister engizý kózdelgen. Bul rette shartqa qatysýshy elderdiń quqyq qorǵaý organdary adamdardy memleketaralyq izdestirýge qatysty qujattarmen almasý maqsatynda vedomstvolyq elektrondyq poshta serverlerin paıdalanady.
— Adamdardy memleketaralyq izdeý týraly shart bizdiń elimizge shetelde qylmystyq qýdalaýdan nemese sot úkimin oryndaýdan jasyrynyp júrgen adamdardy tıimdi izdeý úshin qajet. Shart aıasynda biz izdeýdegi adamdardyń júrgen jerin anyqtaý jáne olardy belgilengen tártippen berý máseleleri boıynsha aqparatpen almasamyz. Kóptegen jyl boıy osy shart aıasynda júıeli jumys júrgizilip keledi. Onyń nátıjesinde kóptegen oń praktıkalyq nátıjelerge qol jetkizildi. Onyń elimiz úshin paıdasy — osyndaı adamdardy izdestirýdiń tıimdiligin arttyrý jáne olardy jaýapqa tartýdy qamtamasyz etý. Búgingi kúnde bizdiń elden basqa barlyq memlekette hattama ratıfıkatsııalanǵan, — dedi ol.
Osyǵan deıin Prezıdent qylmystyq ister boıynsha quqyqtyq kómek týraly zańǵa qol qoıdy.