Prezıdent TMD aıasynda Kreatıvti ındýstrııa qaýymdastyǵyn qurý bastamasyn kóterdi

ASTANA. KAZINFORM — Prezıdent TMD-nyń gýmanıtarlyq yntymaqtastyq jónindegi memleketaralyq qory bazasynda Kreatıvti ındýstrııa qaýymdastyǵyn qurýdy usyndy. Bul týraly Aqordanyń baspasóz qyzmeti habarlady.

Qasym-Jomart Toqaev mádenı-gýmanıtarlyq qatynastar elderimizdi biriktiretin negizgi faktor ekenine nazar aýdardy. Prezıdent dástúr men ınnovatsııany, tarıhı mura men zamanaýı tehnologııany sabaqtastyratyn kreatıvti ındýstrııany damytýdyń bolashaǵy zor dep esepteıdi.

— Qazaqstan osy salany damytý baǵytynda jumys atqaryp jatyr. Búginde kreatıvti sektorymyzdaǵy qosylǵan qun 2 mıllıard dollardan asady. Bul ındýstrııada 143 myń adam jumys isteıdi. Kreatıvti ındýstrııa ekonomıkamyzǵa oń yqpal etýde. Eń mańyzdysy, ol mádenı dıplomatııanyń, elderimiz arasyndaǵy dostyq pen tatý kórshilikti nyǵaıtýdyń tıimdi tetigine aınaldy. TMD elderiniń bul baǵyttaǵy áleýeti zor. TMD-nyń gýmanıtarlyq yntymaqtastyq jónindegi memleketaralyq qory bazasynda Kreatıvti ındýstrııa qaýymdastyǵyn qurýdy usynamyn. Onyń basty maqsaty jas talanttardy qoldaý, birlesken jobalardy iske asyrý, kreatıvti ekonomıkanyń ekojúıesin qalyptastyrý bolýy qajet, — dedi Memleket basshysy.

Buǵan deıin Qasym-Jomart Toqaev TMD elderin tótenshe jaǵdaılardy boljaý ortalyǵyn qurýǵa shaqyrdy.