Prezıdent: Til komıtetin Bilim mınıstrliginiń qaramaǵyna berý kerek

NUR-SULTAN. QazAqparat - Til komıtetin 2021 jyldan bastap Bilim jáne ǵylym mınıstrliginiń qaramaǵyna ótkizgen jón. Bul týraly Ulttyq qoǵamdyq senim keńesiniń 3-otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Memlekettik tildi oqytýdyń tıimdiligin barynsha arttyrýymyz kerek. Bul máselede Eýropa elderdiń tájirıbesine nazar aýdarý qajet. Olar til úıretý barysynda negizinen oqý oryndaryndaǵy jastarǵa kóbirek mán beredi. Sondyqtan Til komıtetin 2021 jyldan bastap Bilim jáne ǵylym mınıstrliginiń qaramaǵyna berý kerek. Bul qazaq tilin oqytý ádistemesin ázirleý jáne ony úıretý isine qatysty áleýetimizdi bir ortalyqqa shoǵyrlandyrýǵa múmkindik beredi. Sondaı-aq, mundaı qadam qoldanysqa engiziletin oqý baǵdarlamalarynyń tıimdiligin taldaý jáne monıtorıng júrgizý júıesin jasaýǵa septigin tıgizedi», - dedi Qazaqstan Prezıdenti.