Prezıdent tıimsiz kásiporyndarǵa memlekettik qoldaýdy doǵarý kerektigin aıtty
ASTANA. QazAqparat - Búgin altynshy saılanǵan QR Parlamentiniń úshinshi sessııasyn ashý barysynda sóz sóılegen Prezıdent Nursultan Nazarbaev tıimdi emes jeke kásiporyndarǵa memlekettik qoldaý jasaýdy doǵarý kerektigin aıtty, dep habarlaıdy QazAqparat.
«Joldaýda qarjyny naqty ekonomıkaǵa deıin jetkizý maqsaty qoıyldy. Kvazımemlekettik sektorda syrtqy ári ishki zaımdar úshin tyńǵylyqty monıtorıng pen qadaǵalaý qajet. Bizde eki qaryz bar, birinshiden, ıaǵnı memleket jaýapkershiligindegi úlesi tómen memlekettik qaryz. Al kvazımemlekettik sektordyń qaryzy ekinshi másele. Osy oraıda bul bizge qatysty emes dep paıymdaýdyń reti joq. Ýaqyt óte kele bul másele bizge qatysty bolýy múmkin. Sondyqtan osy baǵyttaǵy sharalarmen qazir aınalysý kerek», - dedi Elbasy Parlament palatalarynyń birlesken otyrysynda.
Bul turǵyda Prezıdent aýyl sharýashylyǵy salasyndaǵy jaǵdaıǵa toqtaldy.
«Qaryzǵa ala bergendikten, qazir tyǵyryqqa tireldi. Ne isteý kerek? Bankrotqa shyǵarý qajet. Qorqatyn túk te joq. Amerıkada bir mıllıon fermer bankrot bolsa, bir mıllıony qurylady. Jaqynda Astana forýmynda osy turǵyda mysal keltirgen bolatyn. Máselen, Vashıngtonda 1 500 meıramhana bankrotqa tap bolyp, qaıtadan qurylady», - dedi N. Nazarbaev.
Memleket basshysy osyndaı jaǵdaı ekinshi deńgeıli bankterge de qatysty ekenin, olardy taǵy da memleket qarjylandyrýǵa alǵanyn atap ótti.
«Muny toqtatý kerek, eń durysy bul bankterdiń jumysyn toqtatyp, olarǵa tólegendi doǵarǵan jón. Ózi jumys istep, paıda taýyp otyrǵan jekemenshikterdi biz ne úshin sýbsıdııalaýǵa tıispiz? Qazir basqa júıe. Barlyǵy da eger sen jekemenshik bolsań, tolyqtaı óziń jaýap beretindigin túsiný qajet. Bankrot pa - onda bankrot, tıimdi jumys isteı almaısyń degen sóz. Dál osy jolǵa túseıik. Óıtkeni bizde basqa jol joq», - dedi Nursultan Nazarbaev.
