Prezıdent terrorshylarǵa oq atý buıryǵyna qatysty suraqqa jaýap berdi

NUR-SULTAN. QazAqparat – Qańtar oqıǵasy kezinde memlekettiń múddesi, bizdiń azamattardyń qaýipsizdigi máselesi joǵary turdy. Bul týraly «Habar» telearnasyna suhbat bergen Memleket basshysy Qasym-Jomart Toqaev aıtty, dep habarlaıdy QazAqparat tilshisi.Telearnadaǵy suhbat kezinde Prezıdentke terrorshylardy eskertýsiz atýǵa qatysty buıryǵy týraly suraq qoıyldy.

«Osy jaǵdaıda quqyq qorǵaý organdarynyń biryńǵaı algorıtmi, is-qımyl jospary bolmady. Ashyǵyn aıtý kerek, tártipsizdik boldy. Quqyq qorǵaý organdarynyń basshylary ózderine jaýapkershilik alýdan qaýiptendi. Men olarǵa Rokossovskıı nemese Jýkovtyń áreketin mysalǵa keltirdim, ıaǵnı olar kún saıyn Stalınnen qandaı da bir is-qımyldar úshin ruqsat surasa, olar soǵysta jeńiske jeter me edi? Bul jaǵdaıda ózderine jaýapkershilik alý kerek boldy. Bizdiń zańdar osylaı bolyp tur, Jańaózendegi oqıǵadan keıin dál osyndaı jaǵdaılarda quqyq qorǵaý organdaryn erkindigi joq ahýalǵa túsiretin zańdar qabyldandy. Sondyqtan jappaı málimdemege deıin qarýly bandıtterge oq atý kerek ekenin aıtyp, jaýapkershilikti ózime aldym. Al úndeý jasaǵan kezde bul máseleni kópshilikke qaıtalap aıttym», - dedi Memleket basshysy.

Osy oraıda Qasym-Jomart Toqaev mundaı jaǵdaıda Prezıdent ózine jaýapkershilik alýy kerek ekenin jetkizdi.

«Men kásibı dıplomatpyn ǵoı, ahýaldyń saldaryn, dál osyndaı reaktsııa bolatynyn bildim. Atap aıtqanda, memlekettiń múddesi, bizdiń azamattardyń qaýipsizdigi men úshin joǵary turady. Bul jaǵdaıda batys elderiniń reaktsııasyn emes, ózimizdiń memlekettegi jaǵdaıdy tártipke keltirýdi oıladym», - dedi Prezıdent.