Prezıdent: Terrorızm, ekstremızm men separatızmniń beleń alýyna jol berýge bolmaıdy
ASTANA. KAZINFORM – Prezıdent Qasym-Jomart ToqaevShanhaı yntymaqtastyǵy uıymyna múshe memleketterdiń qaýipsizdik keńesteri hatshylarymen kezdesýinde uıymnyń kezinde óńirdegi turaqtylyq pen qaýipsizdikti qamtamasyz etý, «Úsh zulym kúshke» birigip qarsy turý maqsatynda qurylǵanyn eske saldy.
– Búginde mundaı qaterlerdiń seıilmegeni óz aldyna, olar túrlenip, burynǵydan beter qaýipti bola tústi. Óz kezeginde, bizdiń tarapymyzdan anaǵurlym júıeli ári batyl sharalar qabyldaý qajet. Memleketterimizdiń shyrqyn buzatyn terrorızm, ekstremızm jáne separatızm áreketteriniń beleń alýyna jol berýge bolmaıdy. «Úsh zulym kúshke», sondaı-aq transulttyq uıymdasqan qylmysqa, zańsyz esirtki aınalymyna jáne kıberqaýipsizdik syn-qaterlerine qarsy kúres Qazaqstannyń ShYU-ǵa tóraǵalyq etý kezeńindegi eń basty basymdyqtardyń biri sanalady, – dedi Prezıdent.
Memleket basshysynyń paıymdaýynsha, Terrorızmge, separatızmge jáne ekstremızmge qarsy is-qımyl jónindegi 2025-2027 jyldarǵa arnalǵan yntymaqtastyq baǵdarlamasyn qabyldaý kerek. Sonymen qatar Prezıdent ShYU-nyń Esirtkige qarsy 2024-2029 jyldarǵa arnalǵan strategııasyn jáne ony júzege asyrý jónindegi is-qımyl baǵdarlamasyn qabyldaý mańyzdy ekenine toqtaldy.
– ShYU – jańaryp kele jatqan halyqaralyq qaýipsizdik arhıtektýrasy negizderiniń biri. Sondyqtan bizdiń uıym óńirdegi turaqtylyq pen qaýipsizdikti qamtamasyz etýdi kózdeıtin ózara kelisilgen ári naqty qadamdardyń úlgisin kórsetýge tıis, – dedi Qasym-Jomart Toqaev.
Buǵan deıin habarlaǵanymyzdaı, Memleket basshysy Qasym-Jomart Toqaev Shanhaı yntymaqtastyǵy uıymyna múshe memleketterdiń qaýipsizdik keńesteri hatshylarymen kezdesti.
