Prezıdent terezeden qulaǵan balalar jaıynda: Munda ákimdiktiń de jaýapkershiligi bar
NUR-SULTAN. QazAqparat – Jyl basynan beri 14 bala terezeden qulap ketti. Bul týraly Nur-Sultan qalasynyń ákimdiginde ótken elordany odan ári damytý máseleleri jónindegi májiliste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Jyl basynan beri balalardyń tereze men balkonnan qulaýy boıynsha 14 qaıǵyly oqıǵa oryn aldy. Biz mundaı qaıǵyly jaıttardyń qaıtalanýyna jol bermeıtin barlyq sharany qabyldaýǵa tıispiz», - dedi Memleket basshysy.
Osyǵan oraı Qazaqstan Prezıdenti qurylys barysynda qaýipsizdik parametrlerin kúsheıtý qajettigin basa aıtty.
«Úı salýshylar qaýipsizdiktiń qosymsha sharalaryn engizýi tıis. Bir jaǵynan biz árıne belgili bir ǵımaratty salý barysynda sharttardy jeńildetemiz. Al ekinshi jaǵynan keıbir qurylysshylar munyń barlyǵyn teris paıdalanyp otyr. Úılerge qatysty qaýipsizdiktiń qosymsha sharalary bolýy, sózsiz qabyldanýy tıis. 14 bala terezeden qulady. Bul - ata-ananyń, qamqorshylardyń tikeleı kinási. Degenmen, munda ákimdiktiń de jaýapkershiligi bar. Sizder barlyǵy úshin, qalanyń ár turǵyny úshin jaýaptysyzdar», - dedi Q.Toqaev.
