Prezıdent Teleradıokesheniniń mamandary memlekettik nagradalarmen marapattaldy
ASTANA. KAZINFORM — 28 maýsym — BAQ ókilderiniń kásibı merekesi qarsańynda QR Prezıdentiniń Teleradıokesheni qyzmetkerleri memlekettik nagradalarmen marapattaldy. Tıisti Jarlyqqa Memleket basshysy Qasym-Jomart Toqaev qol qoıdy.
Otandyq jýrnalıstıka men televızııany damytýǵa qosqan úlesi úshin Jibek Joly telearnasynyń júrgizýshisi Aıgúl Múkeı «Parasat» ordenimen marapattaldy.
Sondaı-aq, Prezıdent Teleradıokesheniniń aǵa teleoperatory Jańabaı Ahmetov jáne Jibek Joly telearnasy basqarýshy dırektorynyń orynbasary Aınur Imanǵalı «Eren eńbegi úshin» medalimen marapattaldy.
— Bul men úshin jáne Jibek Joly telearnasynyń ujymy úshin úlken qurmet jáne zor jaýapkershilik. Qazir jýrnalıster úshin óte jarqyn kezeń, degenmen qıyndyǵy da az emes. Biz derekter analıtıkasymen jumys isteımiz, jasandy ıntellektiniń barlyq múmkindigin belsendi paıdalanamyz. Sonymen qatar ózimiz túsiremiz, montajdaımyz, redaktsııalaımyz jáne materıaldardy áleýmettik jelilerde de, dástúrli buqaralyq aqparat quraldarynda da jarııalaımyz.
Degenmen, bir mańyzdy jaıtty atap ótkim keledi. Búgingi jas jýrnalıster kitapty kóp oqıdy. Keshe ǵana «Elmen birge» jobasy aıasynda óńirlerge issaparmen baryp qaıttym. Sonda kitaphanaǵa bas suǵyp, jastardyń da, eresekterdiń de, zeınetkerlerdiń de qanshalyqty kóp oqıtynyn kórdim. Mamandardyń aıtýynsha, sońǵy ýaqytta kitaphanaǵa kelip, kitap oqıtyn adamdardyń sany eki esege artqan. Bul — Sizdiń kitap oqıtyn ultty qalyptastyrý jáne kitap oqý mádenıetin damytý jónindegi bastamańyzdyń naqty nátıjesi dep oılaımyn.
Aldaǵy ýaqytta búkil azamattyq qoǵamdy konstıtýtsııalyq reformalarmen baılanysty aýqymdy ózgerister men jańa mindetter kútip tur. Al biz, jýrnalıster, qashanda qoǵamnyń aldyńǵy shebinde júremiz. Jýrnalıster eńbegine kórsetken senimińiz ben qurmetińiz úshin úlken raqmet, — dedi Aıgúl Múkeı Aqordada marapattaý rásiminde.
Bul — Prezıdent Teleradıokesheniniń qazaqstandyq buqaralyq aqparat quraldaryn damytýǵa qosqan úlesine berilgen joǵary baǵa ári qoǵam men memleket ómirindegi mańyzdy róliniń aıqyn kórinisi.
Aıta keteıik, bıyl QR Prezıdentiniń Teleradıokeshenine 30 jyl tolyp otyr. 1996 jyly Memleket basshysynyń qaýlysymen qurylǵan bul qurylym táýelsiz Qazaqstannyń aqparattyq keńistiginde erekshe mıssııa atqaryp keledi. Alǵashynda Prezıdent qyzmetin aqparattyq turǵydan qamtamasyz etetin arnaýly resýrs 30 jylda iri medıaholdıngke aınalyp, eldiń aqparattyq qaýipsizdigi men tarıhı jadyn qalyptastyrýda mańyzdy ról atqaryp keledi.
QR Prezıdentiniń Teleradıokesheni — Qazaqstandaǵy eń iri medıakompanııalardyń biri. Ol kontent jasaý, óńdeý jáne taratý jumystaryn tolyqtaı ózi atqarady jáne ony teledıdar, radıo, ınternet sııaqty barlyq platformalarda usynady.
Búginde Teleradıokeshen quramyna: Jibek Joly respýblıkalyq telearnasy men radıosy, Silk Way, Silk Way Cinema, Silk Way Prime halyqaralyq telearnalary, «Kazinform» halyqaralyq aqparat agenttigi jáne Derekti kıno ortalyǵy kiredi.
