Prezıdent Teleradıokesheniniń qyzmetkerlerine jańa baspana kiltteri berildi
ASTANA. KAZINFORM — Buqaralyq aqparat quraldarynyń qyzmetkerlerine Qazaqstan Prezıdenti Qasym-Jomart Toqaevtyń atynan jańa páterlerdiń kilti tabystaldy.
Saltanatty tabystaý rásimi Astana qalasynda ótti. Memleket basshysynyń atynan páterlerdiń sertıfıkattary men kiltterin jýrnalısterge Qazaqstan Respýblıkasy Prezıdentiniń keńesshisi — Prezıdenttiń baspasóz hatshysy Aıbek Smadııarov tabys etti.
Medıa salasynyń ókilderin kásibı merekesimen quttyqtaǵan ol Prezıdenttiń bastamasymen 2019 jyldan beri 28 maýsym resmı túrde Buqaralyq aqparat quraldary qyzmetkerleriniń kúni retinde atap ótilip kele jatqanyn eske saldy.
— Búgin kásibı mereke qarsańynda biz qýanyshty sebeppen jınalyp otyrmyz. Osy sátti paıdalana otyryp, baspa basylymdarynda, radıo, teledıdarda jáne elektrondy BAQ-ta eńbek etip júrgen barlyq áriptesterdi kásibı merekesimen quttyqtaımyn, — dedi Aıbek Smadııarov.
Ol Prezıdenttiń BAQ qyzmetkerlerin turǵyn úımen qamtamasyz etý jónindegi bastamasy osymen 4 jyl qatarynan júzege asyrylyp jatqanyn atap ótti.
— Memleket basshysynyń tapsyrmasymen mádenıet, densaýlyq saqtaý salasynyń ókilderi, jas ǵalymdar páter alyp jatyr. Buqaralyq aqparat quraldarynyń qyzmetkerleri de nazardan tys qalǵan joq. Bıylǵy jyldyń ereksheligi — baspana tek Astanada ǵana emes, Almatyda, sondaı-aq elimizdiń barlyq óńirlerinde berilip otyr. Óńirlik jýrnalıstıkany qoldaý men BAQ qyzmetkerleriniń áleýmettik jaǵdaıyn jaqsartýdy maqsat etip otyrmyz, — dedi ol.
Aıbek Smadııarovtyń aıtýynsha, irikteý barysynda baspanaǵa muqtaj jandarǵa basymdyq berilgen. Baspanaly bolǵandardyń jartyǵa jýyǵyn tehnıkalyq jáne kishi ákimshilik qyzmetkerler qurady. Budan bólek óńirlik basylymdardyń qyzmetkerlerine erekshe kóńil bólindi.
— Kásibı merekege oraı 10 oblystyq gazettiń qyzmetkerleri baspanamen qamtylady. Sonymen qatar jeke basylymdardyń, sonyń ishinde shalǵaı aýdandardaǵy BAQ jumyskerlerine de qoldaý kórsetildi, — dep málimdedi Prezıdenttiń baspasóz hatshysy.
QR Prezıdenti Teleradıokesheniniń qyzmetkerleri arasynda páter sertıfıkattaryn alǵandar:
«Jibek joly — Silk Way» telearnasy Aqparattyq-saraptamalyq baǵdarlamalar qyzmetiniń shef-redaktory Gúljazıra Mátenova;
«Jibek joly — Silk Way» telearnasy Kontent óndirisi qyzmetiniń atqarýshy prodıýseri Gúljaına Altynbekova;
«Kazinform» halyqaralyq aqparat agenttigi qazaq redaktsııasynyń aǵa taldaýshysy Baqytjan Erbasov.
Sondaı aq «Qazaqstan» ulttyq telearnasy, «Habar» agenttigi» AQ, «Qazcontent» AQ, Prezıdent janyndaǵy Ortalyq kommýnıkatsııalar qyzmeti, «Eýrazııa» telearnasy, «Qazmedıa» JShS, «7-arna», sonymen qatar, «Egemen Qazaqstan», «Kazahstanskaıa pravda» jáne «Astana aqshamy» gazetteriniń qyzmetkerleri de baspana kiltterine ıe boldy.
Aıta keteıik, munymen qosa, Memleket basshysy Prezıdent Teleradıokesheniniń qyzmetkerlerin marapattaǵan edi.
