13:00, 27 Mamyr 2026

Prezıdent Teleradıokesheniniń kınolektorııi Tarazda jalǵasty

TARAZ. KAZINFORM — Prezıdent Teleradıokesheniniń 30 jyldyǵyna oraı uıymdastyrylǵan «Hronıkadan — bolashaqqa» atty aǵartýshylyq jobasynyń ońtústik óńirdegi qorytyndy sharasy Taraz qalasynda ótti.

Prezıdent Teleradıokesheniniń derekti kıno ortalyǵy shyǵarmashylyq tobynyń kelýi jergilikti kórermen tarapynan qyzý qoldaýǵa ıe boldy.

Jambyl oblysy ákiminiń orynbasary Aıjan Esmaǵambetova óńir turǵyndary atynan shyǵarmashylyq ujymǵa alǵys bildirip, kórsetilimderdiń mańyzyna toqtaldy.

— Búginde derekti kıno qoǵamnyń tarıhı jadynyń mańyzdy bóligine aınalyp otyr. Mundaı týyndylar arqyly biz oqıǵalardy tek resmı hronıka retinde emes, adam taǵdyry men úlken úderister arqyly tereńirek túsinemiz. Taraz turǵyndary úshin mazmuny ártúrli bolǵanymen, ıdeıasy ortaq «Aral», «Qýatty seriktes», «Travel Kazakhstan» jáne «Qulaly aralynyń adamy» fılmderin tamashalaýǵa jaqsy múmkindik týdy, — dedi ol.

Kórsetilim barysynda erekshe áser qaldyrǵan týyndylardyń biri — «Qulaly aralynyń adamy» fılmi boldy. Fılm jetýi qıyn meteostantsııada eńbek etetin Petr Lýpenkovtyń ómirin arqaý etedi. Ol órkenıetten alys júrse de, óz isine adal keıipker retinde beınelengen.

Kórermenderdiń biri Adal Aıtqalı fılm týraly pikir bildirip, onyń tereń emotsıonaldyq áserin atap ótti.

— Bul syrttaı baısaldy kóringenimen, ishki mazmuny asa qýatty týyndy. Munda artyq sóz joq, biraq tereń oıǵa jeteleıtin beıneler kóp. Kaspıı teńiziniń qatal tabıǵaty men keıipker taǵdyry adamdy beıjaı qaldyrmaıdy. Petıa (Petıa esimdi keıipker, Petıa kóke) — rýhy myqty tulǵa, — dedi ol.

Al «Travel Kazakhstan» fılmi Qazaqstandy týrıstik baǵytta jańa qyrynan tanystyrǵan týyndy retinde baǵalandy. Kórermender atap ótkendeı, fılm zamanaýı tásildermen túsirilip, jas býynǵa jaqyn formatta usynylǵan.

— Qazaqstandy jańa kózqaraspen kórý qyzyqty boldy. Ásirese blogerlerdiń qatysýy fılmge zamanaýı sıpat bergen. Bul derekti kınonyń da qazirgi zamanǵa saı, tartymdy bola alatynyn kórsetti, — dedi kórermen Anastasııa Rojkova.

Baǵdarlama aıasynda «Aral» fılmi de kórsetildi. Onda Aral teńizimen taǵdyry tyǵyz baılanysty balyqshy Quntýǵan Turǵynbaevtyń ómiri baıandalady. Sonymen qatar, memleket qoldaýymen Aral teńizin qalpyna keltirý baǵytyndaǵy jumystar da qamtylǵan.

Al «Qýatty seriktes» fılmi Qazaqstan Prezıdenti Qasym-Jomart Toqaevtyń 2025 jylǵy jeltoqsanda Japonııaǵa jasaǵan resmı saparyna arnaldy. Týyndy tek resmı kezdesýlermen shektelmeı, tehnologııalyq, energetıkalyq jáne bilim berý salalaryndaǵy jańa jobalardy da keńinen kórsetedi.

Kórermenderdiń aıtýynsha, fılm halyqaralyq qatynastardy tek resmı formatta emes, mazmundy ári dınamıkalyq oqıǵa retinde jetkize bilgen.