Prezıdent teleradıokesheniniń kınolektorııi: shejireden – bolashaqqa
ASTANA. KAZINFORM – 2026 jyly 21 mamyr kúni Astana qalasynda Qazaqstan Respýblıkasy Prezıdenti teleradıokesheniniń 30 jyldyǵyna arnalǵan respýblıkalyq kınolektorıı bastalady.
Mereıtoılyq is-shara aıasynda Prezıdent teleradıokesheniniń 30-dan astam avtorlyq derekti fılmi elimizdiń 20 qalasynda kórermen nazaryna usynylmaq. Aýqymdy aǵartýshylyq joba barlyq oblys ortalyǵyn qamtyp, 25 qyrkúıekte Almaty qalasynda máresine jetedi.
Kınolektorııdiń basty maqsaty – kórermendi Prezıdent teleradıokesheniniń óndiristik bazasy – Derekti kıno ortalyǵynyń negizgi jobalarymen tanystyrý.
Týyndylar Memleket basshysynyń qyzmetin, Qazaqstannyń qazirgi zaman tarıhyn jáne aımaqtardyń damý barysyn baıandaıdy. Baǵdarlamaǵa klassıkalyq derekti fılmderden bastap, zamanaýı qysqametrajdy jáne vertıkaldy formattaǵy 30-dan astam týyndy endi.
Bul fılmder – aýqymdy reformalar men ózgeristerden bastap, qarapaıym jandardyń taǵdyryna deıin qamtıtyn elimizdiń naǵyz shejiresi. Astanadan bastalyp, barlyq oblys ortalyǵyn aralap, Almatyda aıaqtalatyn mádenı-aǵartýshylyq joba memleket saıasaty men qundylyqtaryn nasıhattaýǵa baǵyttalǵan.
Kıno kórsetilimderi aımaqtardaǵy jergilikti kınoteatrlarda ótedi. Bul óńir turǵyndarynyń sapaly derekti kontentti tamashalaýyna múmkindik beredi. Sonymen qatar is-shara aıasynda Derekti kıno ortalyǵynyń shyǵarmashylyq tobymen kezdesýler, talqylaýlar jáne jastarǵa arnalǵan dárister uıymdastyrylady.
Joba oblys ákimdikterimen birlese júzege asyrylýda. Kórermen úshin kirý tegin. Kórsetilim kestesi men kınolektorıı baǵdarlamasy Prezıdent teleradıokesheniniń resmı resýrstarynda jarııalanady.
