Prezıdent teleradıokesheniniń kınolektorııi eldiń barlyq aımaǵyn aralaıdy
ASTANA. KAZINFORM — 21 mamyr kúni Astana qalasynda Prezıdent teleradıokesheniniń «Shejireden bolashaqqa» atty respýblıkalyq kınolektorııi bastalady.
Aýqymdy joba elimizdiń 20 qalasynda jalǵasyp, qorytyndy kórsetilim 25 qyrkúıekte Almaty qalasynda máresine jetedi.
Kınolektorıı baǵyty barlyq oblys ortalyǵyn qamtyp, avtorlyq derekti fılmderdi óńir turǵyndaryna barynsha qoljetimdi etýdi maqsat etedi. Kórsetilimder oblys ákimdikteriniń qoldaýymen aımaqtyq kınoteatrlarda uıymdastyrylady. Kirý tegin.
Prezıdent teleradıokesheniniń shyǵarmashylyq kerýeni Qyzylorda, Túrkistan, Shymkent, Taraz, Aqtaý, Atyraý, Oral, Aqtóbe, Óskemen, Semeı, Pavlodar, Petropavl, Qostanaı, Jezqazǵan, Qaraǵandy, Kókshetaý, Taldyqorǵan jáne Qonaev qalalaryn aralaıdy.
Ár óńirdegi kórsetilimnen keıin kórermen Prezıdent teleradıokesheniniń jeke óndiristik bazasy – Derekti kıno ortalyǵynyń shyǵarmashylyq ujymymen júzdese alady. Derekti fılmderdiń mazmunyn talqylaý kórermender arasynda eldiń ótkeni, búgini men bolashaǵy týraly mazmundy ashyq dıalog qalyptastyrady.
Kınolektorıı kestesi jáne kórsetilim baǵdarlamasy Prezıdent teleradıokesheniniń resmı resýrstarynda jáne seriktes platformalarda jarııalanyp turady. Kórermen aldyn ala kestemen tanysyp, unaǵan týyndylardy tańdap, óz qalasynda ótetin sharalarǵa qatysa alady.
«Shejireden bolashaqqa» atty aýqymdy aǵartý jobasy Qazaqstan Respýblıkasy Prezıdenti Teleradıokesheniniń 30 jyldyq mereıtoıyna oraı uıymdastyrylyp otyr.
Aıta ketelik jyl saıynǵy kınojobalar konkýrsynda bıyl qandaı taqyryptarǵa basymdyq beriletini týraly jazǵan edik.
