Prezıdent teleradıokesheniniń derekti fılmi halyqaralyq «Eýrazııa.DOC» festıvalinde arnaıy dıplomǵa ıe boldy
ASTANA. KAZINFORM – Prezıdenttik teleradıokeshen túsirgen «Qulaly aralynyń turǵyny» derekti fılmi TMD elderiniń derekti kınofestıvalinde arnaıy dıplommen marapattaldy. Kartınaǵa «Adam men tabıǵat birliginiń poetıkalyq beınesi úshin» dıplomy berildi.
Bul týyndy Mınskide ótken mereıtoılyq kınofestıvaldiń negizgi baǵdarlamasynda Qazaqstan atynan usynylǵan jobalardyń biri boldy. «Qulaly aralynyń turǵyny» fılminiń baıqaý baǵdarlamasyna iriktelýi qazaqstandyq derekti kınoǵa halyqaralyq kásibı qaýymdastyqtyń nazar aýdaryp otyrǵanyn kórsetedi.
-Fılm Kaspıı teńizindegi Qulaly aralynda órkenıetten jyraqta ómir súretin meteorolog týraly baıandaıdy. Keıipkerdiń kúndelikti tirshiligi arqyly avtorlar onyń ishki álemin, ońasha ómir súrý týraly sanaly sheshimin jáne minezin qalyptastyrǵan ómirlik synaqtarynyń syryn ashady, – dep jazylǵan «Eýrazııa.DOC» halyqaralyq festıvaliniń baspasóz habarlamasynda.
Fılmdi Prezıdent teleradıokesheniniń túsirilim toby ázirlegen. Rejısseri – Almas Sátkenov, stsenarıı avtory – Elmıra Ishmuhamedova, prodıýseri – Ádilbek Qulaman, operatorlary – Saıat Tastanov pen Qanat Eńsebaev, montajdaýshysy – Rýslan Aıtmambetov.
«Eýrazııa.DOC» halyqaralyq festıvali TMD elderiniń derekti kıno mamandaryn biriktirip, qoǵamdaǵy ózekti máselelerge, tarıhı oqıǵalarǵa jáne adam taǵdyryna arnalǵan fılmderdi usynady.
Prezıdent teleradıokesheniniń «Qulaly aralynyń turǵyny» derekti fılminiń festıvaldiń baıqaý baǵdarlamasyna enýi halyqaralyq kınofestıvalder alańynda qazaqstandyq derekti kınoǵa qyzyǵýshylyq artyp kele jatqanyn kórsetedi.
Osyǵan deıin Prezıdent Teleradıokesheniniń jańa derekti fılmi týraly jazdyq.
