Prezıdent teleradıokesheniniń derekti fılmi halyqaralyq kınofestıvaldiń marapatyn aldy

ASTANA. QazAqparat - QR Prezıdenti Teleradıokesheniniń «Kaspıı ıtbalyǵy nege óledi?» (Pochemý ýmıraet kaspııskıı tıýlen?) atty derekti fılmi «Zılant» kınofestıvaliniń marapatyna ıe boldy, dep habarlaıdy QazAqparat tilshisi.

Rejısser Aqylbek Shaljanovtyń «Kaspıı ıtbalyǵy nege óledi?» derekti fılmi «Qorshaǵan orta týraly úzdik fılm» nomınatsııasynyń jeńimpazy atandy.

Fılmde sońǵy 100 jyldaǵy Kaspıı ıtbalyǵy popýlıatsııasynyń 90% deıin azaıýy, olardyń ólý sebep nusqalary baıandalǵan. 2020 jyly Kaspıı ıtbalyǵy otandyq qyzyl kitapqa engizildi.

Memleket basshysy Qasym-Jomart Toqaev 2022 jylǵy 29 maýsymda Ashhabadta ótken altynshy Kaspıı sammıti barysynda ıtbalyqtardy qutqarý qajettigi týraly aıtty.

«Kaspıı ıtbalyǵy – endemık jáne Kaspıı teńizi faýnasyndaǵy sútqorektilerdiń jalǵyz ókili. Búkil sý aıdyny onyń mekeni jáne transshekaralyq bıoresýrs bolyp sanalady. Kaspıı ıtbalyqtarynyń ólý faktileri alańdaýshylyq týǵyzady», - degen edi Prezıdent.

Aıta ketsek, «Zılant» halyqaralyq kınofestıvali 25-26 aqpan aralyǵynda Qazan qalasynda ótti.

Kınofestıvaldiń maqsaty - álem elderiniń shyǵarmashylyq ujymdarynyń tájirıbesi jáne kórkemdik jetistikterimen almasý. Umytylmas mereke atmosferasyn qurý, ártúrli elder balalarynyń, jastary men eresekteriniń oı-órisi men zııatkerlik deńgeıin keńeıtý.