Prezıdent teleradıokesheni men «TPS» AA yntymaqtastyqqa jáne aqparat almasýǵa ýaǵdalasty

ASTANA. QazAqparat – Búgin elordada Qazaqstan Respýblıkasy Prezıdentiniń Teleradıokesheni Izraıldiń «Tazpit Press Service» aqparat agenttigimen yntymaqtastyq týraly memorandýmǵa qol qoıdy, dep habarlaıdy QazAqparat tilshisi.

Memorandýmdy QR Prezıdenti Teleradıokesheniniń bas dırektory Raýshan Qajybaeva men «Tazpit Press Service» AA bas dırektory Amotts Eıal rásimdedi.

Qujat medıa-kontent almasý, birlesken medıa-óndiris, adamı kapıtaldy damytý, ulttyq jáne halyqaralyq deńgeıde bir-birin ilgeriletý salalaryndaǵy ózara seriktestik qarym-qatynas ornatýǵa baǵyttalǵan.

Prezıdent TRK bas dırektory R.Qajybaevanyń aıtýynsha, mádenı-gýmanıtarlyq baılanys halyqtar men memleketter arasyndaǵy qatynasty damytý úshin negiz qalyptastyrady.

R.Qajybaeva atap ótkendeı, «buǵan aqparattyq saladaǵy ózara is-áreket septigin tıgizedi. Osy turǵydan alǵanda aqparattyq materıaldarmen almasý, birlesken jobalar qurý, túrli oqıǵalardy jazyp kórsetýdegi áriptesterdiń tájirıbesin zerdeleý elderimiz arasyndaǵy qarym-qatynasty nyǵaıtady».

Óz kezeginde, «TPS» AA bas dırektory A.Eıal qazaqstandyq medıamen yntymaqtastyq ornatý mańyzdylyǵyna nazar aýdaryp, búgin qol qoıylǵan memorandým «Qazaqstan men Izraıldiń eki jetekshi medıa-kompanııasynyń tabysty yntymaqtastyǵy bastaýynyń qadamy» sanalatyndyǵyn aıtty.

Búgin qol qoıylǵan Yntymaqtastyq týraly memorandým Prezıdent Teleradıokesheniniń «Saudi Press Agency», «Trend», «Yonhap», «Armenpress» syndy sheteldiń jetekshi medıa-kompanııalarymen halyqaralyq kelisimi pýlyn tolyqtyra tústi.

Anyqtama úshin:

QR Prezıdentiniń teleradıokesheni Qazaqstannyń iri medıa-kompanııasy sanalady. Onyń quramyna Jibek Joly respýblıkalyq telearnasy, Silk Way halyqaralyq telearnasy, «QazAqparat» HAA jáne Derekti kıno ortalyǵy kiredi.

«Tazpit Press Service» AA – Izraıldiń 2010 jyldan beri jumys isteıtin iri aqparat agenttigi. Ol elde jáne óńirde jańalyq materıaldaryn ázirleýdi jáne taratýdy qamtamasyz etedi.