Prezıdent Teleradıokesheni men Maqsut Narikbayev University Qazaqstanda alǵashqy halyqaralyq jýrnalıstıka mektebin ashady
Memorandýmǵa TRK Bas dırektory Raýshan Qajybaeva men Maqsut Narikbayev University Basqarma tóraǵasy Talǵat Nárikbaev qol qoıdy.
Atalǵan qujat talantty jastardy qoldaý men kásibı damytýdaǵy, qoǵam men memlekettiń zamanaýı kommýnıkatıvtik suranystaryna jaýap beretin jýrnalıstik korpýsty qalyptastyrýdaǵy mańyzdy qadamnyń biri.
Sát saıyn ózgeretin medıa naryǵy jaǵdaıynda kásibı bilimniń ózektiligi, elde jáne álemde bolyp jatqan jahandyq úderisterdegi BAQ-tyń áleýmettik, mádenı, saıası, ekonomıkalyq róli artyp keledi. Osy turǵyda Prezıdent Qasym-Jomart Toqaev qazaqstandyq BAQ aldyna naqty mindetter qoıyp otyr.
«Buqaralyq aqparat quraldary qoǵamdyq sanany jańǵyrtyp, ulttyń jańa sapasyn qalyptastyrýda basty ról atqarýy qajet. Mass-medıanyń aqparat keńistiginde ozyq ıdeıalar men kózqarastardy ilgeriletýde múmkindigi mol. Sondyqtan jýrnalısterdiń qoǵamda eńbek pen kásibılik kýltiniń ornyǵýyna, azamattardyń boıynda óz eliniń taǵdyryna degen jaýapkershilik sezimin qalyptastyrýǵa atsalysýy mańyzdy» - dep atap ótken bolatyn Memleket basshysy BAQ qyzmetkerleriniń kásibı merekesimen quttyqtaýynda.
Halyqaralyq jýrnalıstıka mektebiniń bilim berý baǵdarlamasynda buqaralyq aqparat quraldarynyń sońǵy tendentsııalaryna sáıkes jýrnalıstıkanyń zamanaýı ádisterin oqytýǵa erekshe mán beriledi. Tájirıbe úshin mundaı múmkindikterdi «Jibek Joly» telearnasy, «QazAqparat» HAA, Derekti kıno ortalyǵynyń platformasy usynady.
«Jobanyń biregeıligi – bizdiń medıa mektebimiz qoǵam men memleket suranysyna saı jýrnalıstik korpýsty tolyqtyratyn kásibı joǵary mamandandyrylǵan medıa mamandaryn daıyndaıdy», - dedi QR Prezıdenti Teleradıokesheniniń basshysy.
Halyqaralyq jýrnalıstıka mektebi stýdentterge kásibı damýdyń úlken múmkindikterin usynady. Oǵan stajırovkalar, jetekshi medıa menedjerler men sarapshylar qaýymdastyǵynyń sheberlik saǵattary kiredi.
«Maqsut Narikbayev University jetekshi halyqaralyq oqý oryndarymen belsendi yntymaqtastyq ornatqan. Bul ozyq álemdik tájirıbeni qoldanýǵa múmkindik beredi. Bizdiń joba Qazaqstan jýrnalıstıkasynyń damýyna, BAQ mamandarynyń jańa býynyn daıyndaýǵa septigin tıgizetinine senimdimiz», - dedi Talǵat Nárikbaev.
