Prezıdent Teleradıokesheni men AnewZ telearnasy yntymaqtastyq týraly kelisti
ASTANA. KAZINFORM – Prezıdent Teleradıokesheniniń keńsesine AnewZ Global Media Channel jańa ázerbaıjandyq telearna dırektory Rýfat Hamzaev bastaǵan delegatsııa keldi.
Kezdesý barysynda kásibı saladaǵy ózara is-qımyldy damytý perspektıvalary qaraldy. Atap aıtqanda, Silk Way men AnewZ ózara kontentpen almasý, sol sııaqty qyzmetkerlerge arnalǵan bilim berý baǵdarlamalary, tilshiler jelisiniń resýrstaryn paıdalaný máseleleri talqylandy.
Onyń ishinde Ázerbaıjan tarapynyń Silk Way telearnasy negizinde qurylatyn biryńǵaı Ortalyq Azııa telearnasy jobasyna qatysýy máselesine erekshe kóńil bólindi.
AnewZ dırektory Rýfat Hamzaev Silk Way telearnasynyń tabysty damyp kele jatqanyn atap ótip, onyń kontenti ázerbaıjandyq kórermender arasynda zor qyzyǵýshylyq týdyryp jatqanyn jetkizdi.
Onyń aıtýynsha, eki eldiń buqaralyq aqparat quraldary Ortalyq Azııa men Kavkaz óńirleriniń ómiri týraly dúnıejúzine aqparat taratýda ózara tıimdi yntymaqtastyq ornatýdyń áleýeti zor.
Kezdesý qorytyndysy boıynsha taraptar medıa salasyndaǵy áriptestikti belsendi damytý qajettigin atap ótti. Bul baǵytta yntymaqtastyq týraly kelisimge qol qoıý josparlanyp otyr.
Aıta keteıik, Prezıdent Teleradıokesheniniń ázerbaıjandyq buqaralyq aqparat quraldarymen burynnan qalyptasqan jemisti baılanysy bar. «Kazinform» halyqaralyq aqparat agenttigi AzerTag jáne Trend agenttikterimen belsendi yntymaqtastyq ornatyp keledi.
Qazaqstandaǵy eń iri medıakompanııalardyń biri - Prezıdent Teleradıokesheniniń quramyna Jibek Joly, Silk Way, Silk Way Cinema telearnalary, elimizdegi eń kóne halyqaralyq aqparat agenttigi – «Kazinform» jáne Derekti kıno ortalyǵy kiredi.
AnewZ — 2024 jyldyń 4 qarashasynan bastap jumys isteı bastaǵan, táýlik boıy habar taratatyn, aǵylshyn tilindegi halyqaralyq jańalyqtar telearnasy. Ol álem jańalyqtaryna balama kózqaras pen taldaý jasaýǵa baǵyttalǵan.
Eske salsaq, jyl basynda Prezıdent Teleradıokesheni ıordanııalyq BAQ-pen baılanysyn damytatyny týraly habarlaǵan edik.
Odan bólek, ótken jyly QR Prezıdentiniń Teleradıokesheni men Al Jazeera ekinshi birlesken jobany qolǵa aldy.