Prezıdent Teleradıokesheni ırandyq áriptesterimen yntymaqtastyqty damytýda
Taraptar buqaralyq aqparat quraldarynyń ózara is-qımylyn arttyrý, kontent almasý jáne birlesken jobalardy iske qosý máselelerin talqylady. Qos memleket qarym-qatynasyndaǵy mádenı baılanystardyń mańyzdy róli de erekshe atap ótildi.
Prezıdent Teleradıokesheniniń bas dırektory Raýshan Qajybaevanyń aıtýynsha, mádenı baılanystar dástúrli túrde halyqtar men elder arasyndaǵy myzǵymas, dostyq qarym-qatynasty damytýdyń berik negizi bolady.
«Medıasaladaǵy yntymaqtastyq ta osyǵan septigin tıgizedi. Jańalyqtardy, jobalardy bólisý jáne olardy birlesip óndirý tájirıbe almasýǵa ǵana emes, eń aldymen, elderimizdi jaqyndatýǵa múmkindik beredi», - dedi Raýshan Qajybaeva.
Óz kezeginde, Iran Islam Respýblıkasynyń Qazaqstandaǵy Tótenshe jáne Ókiletti Elshisi Álı Akbar Djoýkar qazaqstandyq jáne ırandyq medıakompanııalar arasynda ónimdi yntymaqtastyqty jolǵa qoıýdyń mańyzdy ekenin atap ótti.
«Búgingi kezdesý – Qazaqstan men Iran Teleradıokeshenderiniń yntymaqtastyǵy jolyndaǵy mańyzdy qadam jáne «QazAqparat» pen «IRNA» agenttikteriniń birlesken jumysyna jańa serpin beredi», – deıdi Álı Akbar Djoýkar.
Dıplomatııalyq mıssııa basshysy «Jibek Joly» jáne «Silk Way» telearnalarynyń Ortalyq Azııadaǵy eń zamanaýı robottandyrylǵan stýdııasyna baryp, jetekshi qazaqstandyq BAQ-tyń tehnıkalyq jaraqtandyrý deńgeıi álemdik ozyq standarttarǵa saı keletinin jetkizdi.
Kezdesý qorytyndysy boıynsha taraptar Qazaqstan Respýblıkasy Prezıdentiniń Teleradıokesheni men Iran Islam Respýblıkasynyń medıauıymdary arasyndaǵy ekijaqty qatynastardy damytýdyń keshendi jol kartasyna qol qoıýǵa daıyn ekenderin bildirdi.
Aıta keteıik, QR Prezıdentiniń Teleradıokesheni – Qazaqstannyń iri medıakompanııasy, onyń quramyna: «Jibek Joly» respýblıkalyq telearnasy, «Silk Way» halyqaralyq telearnasy, «QazAqparat» halyqaralyq aqparat agenttigi jáne Derekti kıno ortalyǵy kiredi.
