QR Prezıdenti Teleradıokesheniniń Japonııadaǵy seriktesi — Jiji Press
TOKIO. KAZINFORM — Búgin Qazaqstan Prezıdenti Qasym-Jomart Toqaevtyń Japonııaǵa resmı sapary aıasynda Qazaqstan Respýblıkasy Prezıdentiniń Teleradıokesheni men Japonııanyń jetekshi aqparat agenttigi Jiji Press yntymaqtastyq týraly kelisimge qol qoıdy.
Atalǵan kelisim eki eldiń aqparattyq salasyndaǵy ózara is-qımyldy tereńdetýge baǵyttalǵan jáne jańalyqtar almasýǵa, mańyzdy oqıǵalardy birlesip jarııalaýǵa, sondaı-aq eki medıanyń keń aýdıtorııasyn jedel, ózekti ári senimdi aqparatpen qamtý múmkindikterin keńeıtedi.
Raýshan Qajybaeva atap ótkendeı, «eki eldiń jetekshi buqaralyq aqparat quraldarynyń tyǵyz yntymaqtastyǵy mádenı-gýmanıtarlyq baılanystardy nyǵaıtyp, Qazaqstan men Japonııa halqynyń jaqyndasýyna yqpal etedi».
Óz kezeginde Jiji Press basshylyǵy ózara seriktestikke qyzyǵýshylyq tanytyp, jaqyn arada Qazaqstanǵa saparmen kelýge daıyn ekenin jetkizdi.
2026 jyly taraptar eki eldiń týrıstik, ınvestıtsııalyq jáne bıznes áleýetin ilgeriletýge, sondaı-aq kásibı tájirıbe almasýǵa baǵyttalǵan birqatar birlesken jobalardy júzege asyrady dep kútiledi.
Qazaqstan Respýblıkasy Prezıdentiniń Teleradıokesheni — kontentti óndirý men taratýdyń barlyq kezeńin qamtıtyn, elimizdegi eń iri tik ıntegratsııalanǵan medıa kompanııasy. Teleradıokeshen quramyna Jibek Joly respýblıkalyq telearnasy men radıosy, Silk Way, Silk Way Cinema, Silk Way Prime halyqaralyq telearnalary, «Qazınform» halyqaralyq aqparat agenttigi jáne Derekti fılmder ortalyǵy kiredi.
Jiji Press — 1945 jyldan beri jumys istep kele jatqan Japonııadaǵy eń iri ári yqpaldy aqparat agenttikterdiń biri. Agenttiktiń 20-dan astam sheteldik bıýrosy bar jáne Japonııanyń barlyq prefektýralarynda ókildikteri ornalasqan.
Jiji Press materıaldary japon jáne aǵylshyn tilderinde jarııalanyp, japondyq jáne halyqaralyq aýdıtorııa úshin jedel ári senimdi aqparattyń negizgi derekkózi sanalady. Agenttiktiń seriktesteri qatarynda Agence France-Presse, Reuters, Xinhua jáne basqa da álemdik jetekshi aqparat agenttikteri bar.
Eske sala keteıik, buǵan deıin Qazaqstan men Qyrǵyzstannyń iri medıaqurylymdary yntymaqtasýǵa keliskenin jazǵan edik.