Prezıdent teleradıokesheni: Tájikstandaǵy jańa medıaseriktester
ASTANA. KAZINFORM — Tájikstan Prezıdenti Emomalı Rahmonnyń Astanaǵa resmı sapary aıasynda Qazaqstan Prezıdentiniń Teleradıokesheni men Tájikstannyń medıa qurylymdary arasynda ózara túsinistik pen yntymaqtastyq týraly memorandýmdarǵa qol qoıyldy.
Qujattarǵa qol qoıý rásimine eki eldiń memleket basshylary — Qazaqstan Prezıdenti Qasym-Jomart Toqaev pen Tájikstan Prezıdenti Emomalı Rahmon qatysty.
Prezıdent Teleradıokesheni Tájikstan Úkimeti janyndaǵy Teledıdar jáne radıo komıtetimen, «Safına» telearnasymen jáne «Djahonnamo» telearnasymen ózara túsinistik pen yntymaqtastyq týraly memorandýmdar ornatty.
Qujattarǵa QR Prezıdenti Teleradıokesheniniń dırektory Raýshan Qajybaeva men Tájikstan Úkimeti janyndaǵy Teledıdar jáne radıo komıtetiniń tóraǵasy Nosır Saıdzoda qol qoıdy.
Bul ýaǵdalastyqtar kásibı baılanysty damytýǵa, aqparat salasyndaǵy áriptestikti nyǵaıtýǵa, televızııa jáne radıo baǵytyndaǵy yntymaqtastyqty keńeıtýge, sondaı-aq redaktsııalar men shyǵarmashylyq ujymdar arasyndaǵy ózara is-qımylǵa jol ashýǵa baǵyttalǵan.
Prezıdent Teleradıokesheniniń dırektory Raýshan Qajybaeva yntymaqtastyqtyń basty maqsaty — qazaqstandyq jáne tájikstandyq medıamamandar arasyndaǵy baılanysty damytý, sondaı-aq Qazaqstan men Tájikstannyń mádenı-gýmanıtarlyq qarym-qatynastaryn nyǵaıtý ekenin atap ótti.
Tájikstan Úkimeti janyndaǵy Teledıdar jáne radıo komıtetiniń tóraǵasy Nosır Saıdzodanyń aıtýynsha, qol qoıylǵan qujattar qazaqstandyq áriptestermen uzaqmerzimdi seriktestik ornatýǵa múmkindik beredi.
— Kásibı tájirıbe almasý men halyqtarymyzdyń bir-birin, mádenıeti men dástúrin tereńirek tanyp-bilýine yqpal etetin materıaldar ázirleý baǵytynda úlken áleýet bar dep sanaımyz, — dedi ol.
Taraptar kásibı baılanysty memlekettik beıindi organnan bastap ulttyq tele-radıoarnalarǵa deıingi birneshe deńgeıde damytýdyń mańyzyn atap ótti. Úsh memorandýmǵa qol qoıylýy Qazaqstan men Tájikstannyń buqaralyq aqparat quraldary salasyndaǵy yntymaqtastyǵyn nyǵaıtý jolyndaǵy kezekti qadam boldy.
QR Prezıdentiniń Teleradıokesheni — Memleket basshysynyń qyzmetin aqparattyq turǵyda súıemeldeıtin medıaresýrs. Medıaholdıng quramyna Jibek Joly telearnasy, Derekti kıno ortalyǵy, Jibek Joly radıostantsııasy jáne elimizdegi eń tarıhı aqparat agenttigi — Kazinform HAA kiredi. Aqparat agenttigi qazaq, orys, ózbek, aǵylshyn, qytaı tilderinde jáne tóte jazýmen aqparat taratady.
Tájikstan Respýblıkasy Úkimeti janyndaǵy Teledıdar jáne radıo komıteti – eldegi memlekettik teleradıo habarlaryn taratý jáne kınematografııa salasyna basshylyq jasap, onyń jumysyn retteıtin Úkimettiń negizgi ýákiletti organy.
«Djahonnamo» – Tájikstandaǵy táýlik boıy habar taratatyn jalǵyz memlekettik aqparattyq telearna. Arna jedel jańalyqtar men saraptamalyq materıaldarǵa basymdyq beredi. Onyń respýblıka ishinde de, shetelde de tilshiler jelisi qalyptasqan.
«Safına» – mádenı-aǵartýshylyq jáne áleýmettik-ekonomıkalyq baǵyttaǵy jetekshi memlekettik telearna. Dýshanbede zamanaýı tsıfrlyq stýdııa kesheni bar. Telearna tájik jáne orys tilderinde habar taratady.
Aıta keteıik, Aqordada Qazaqstan men Tájikstannyń resmı delegatsııalary úkimetaralyq jáne vedomstvoaralyq deńgeıde 14 qujatqa qol qoıdy.
5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
