Prezıdent Teleradıokesheni tarıhı oqıǵalardy qalaı taspalaıdy
ASTANA. KAZINFORM — QR Prezıdenti Teleradıokesheniniń Derekti kıno ortalyǵy myńdaǵan tarıhı sátti taspalap, myńnan astam derekti fılm ázirledi. Ekrannan nebári 30 mınýt kórsetiletin ár týyndynyń artynda uzaq izdenis, shyǵarmashylyq eńbek pen úlken jaýapkershilik jatyr. Bul týraly «Jibek joly» radıosyndaǵy «Arnaıy habar» baǵdarlamasynda ortalyq mamandary aıtyp berdi.
Derekti kıno ortalyǵynyń dırektory Aqylbek Shaljanovtyń aıtýynsha, ortalyq Memleket basshysynyń qyzmeti men qoǵamdaǵy mańyzdy oqıǵalardy arqaý etken qoǵamdyq-saıası kontent ázirleıdi. Sondyqtan túsirilgen árbir kadrdyń tarıhı mańyzy erekshe.
– Biz túsirgen árbir kadrdy tarıh dep qabyldaımyz. Prezıdenttiń ishki jáne syrtqy saparlary, memleket basshylarymen kezdesýleri, túrli halyqaralyq oqıǵalar – munyń bári bolashaq urpaq úshin arhıv bolyp qalady. Sondyqtan árbir fılmniń jaýapkershiligi óte joǵary, – dedi ol.
Aqylbek Shaljanovtyń pikirinshe, derekti kıno jańalyqtan ózgeshe janr. Munda ár kadr muqııat iriktelip, rejısser, stsenarıst, redaktor, montaj rejısseri men prodıýser birlese jumys isteıdi.
– Biz úshin basty maqsat – sapaly dúnıe jasaý. Ár kadr taldanyp túsiriledi, ár epızodtyń óz orny bar. Bul – úlken shyǵarmashylyq ujymnyń ortaq eńbegi, – dedi ol.
Derekti fılmniń sapaly shyǵýynda prodıýserlerdiń de róli aıryqsha. Derekti kıno ortalyǵynyń bas prodıýseri Ádilbek Qulamannyń aıtýynsha, ár týyndy birneshe kezeńnen turatyn uzaq daıyndyqtyń nátıjesinde dúnıege keledi.
– 30 jylda 1000-nan astam fılm túsirildi. Ár jumys ıdeıadan bastalady. Keıin stsenarıı jazylady, túsirilim ótedi, montajdalyp, dybyspen árlenedi. Munyń bárin úılestirýde prodıýserdiń jaýapkershiligi úlken, – dedi ol.
Ásirese Memleket basshysynyń sheteldik saparlaryna arnalǵan fılmderge qoıylatyn talap joǵary. Sebebi mundaı saparlarda kóteriletin máselelerdiń mazmuny kóbine sońǵy sátte naqtylanady.
– Biz aldyn ala memleketter arasyndaǵy qarym-qatynasty, buǵan deıingi kezdesýlerdi, kóterilgen máselelerdi zertteımiz. Sapar aıaqtalǵan boıda stsenarıı jazylyp, montaj bastalady. Óıtkeni búgingi aqparat erteń tarıhqa aınalady. Sondyqtan materıaldy ýaqytyly ári dál jetkizý asa mańyzdy, – dedi spıker.
Sonymen qatar shyǵarmashylyq top ár fılmde resmı stıl men kórkemdikti úılestirýge tyrysady.
– Kezdesý keshke aıaqtalsa, tańerteń stsenarıı daıyn bolýy kerek. Qydyrýǵa ýaqyt joq. Bar kúsh-jiger aqparatty jedel ázirleýge jumsalady. Resmı stıl men kórkemdik te mańyzdy, – dedi ol.
Sheteldik issaparlar barysynda aqparat taratýmen qatar Qazaqstannyń ulttyq bolmysyn tanytýǵa da erekshe kóńil bólinedi. Shyǵarmashylyq top aldyn ala baryp, atmosferalyq beınerolıkter túsiredi. Onda qazaqtyń dombyrasy, ulttyq kıimi men mádenıeti keńinen nasıhattalady.
– Biz Qazaqstandy mádenıetimiz arqyly da tanytqymyz keledi. Dombyra úni shetelde shyrqalyp, ulttyq qundylyqtarymyz álemge tanylsa degen nıetimiz bar Osy baǵyttaǵy sońǵy jumystardyń biri – Memleket basshysynyń Belgııaǵa sapary negizinde túsirilgen «Brıýssel dıalogy» derekti fılmi. Qazir týyndy respýblıkalyq telearnalar men YouTube platformasynda qoljetimdi., – dedi ol.
Al ortalyq redaktory Nurlan Qabdaıulynyń aıtýynsha, sapaly derekti fılmniń basty ereksheligi – onyń barlyq elementiniń bir-birimen tabıǵı úılesim tabýynda.
– Dıktordyń daýysy, mýzykasy, kadry, mátini – bári bir-birin tolyqtyryp turýy kerek. Keıde kórermen ekranǵa qaramasa da dıktordyń daýysynan oıdy túsinedi. Al keıde bir ǵana kadrdyń ózi bárin aıtyp turady. Derekti kınonyń ereksheligi osynda, – dedi ol.
Prezıdent teleradıokesheniniń 30 jyldyǵyna oraı bul jumystar endi kórermenge jańa formatta usynylyp jatyr. Qazir el kóleminde «Hronıkadan bolashaqqa» respýblıkalyq kınolektorııi ótip, shyǵarmashylyq top Qazaqstannyń óńirlerinde kórermenmen kezdesip, úzdik týyndylaryn tanystyrýda.
– Biz úshin eń úlken jetistik – kórermenniń emotsııasy. Eger adam mańyzdy oı túıip shyqsa, eńbegimizdiń aqtalǵany, – dedi Aqylbek Shaljanov.
Kınolektorıı barysynda erekshe qyzyǵýshylyq týdyrǵan týyndylardyń biri – Aral taǵdyry týraly derekti fılm. Avtorlardyń aıtýynsha, onda bir adamnyń ómiri arqyly tutas óńirdiń ekologııalyq máselesi men eńbek adamynyń taǵdyry kórinis tapqan.
– Aral máselesi – Qazaqstannyń ǵana emes, búkil álemniń problemasy. Sondyqtan bul taqyrypty kóterýdi mańyzdy sanadyq. Fılmdegi keıipker Kúntýǵan Turǵanbaev týyndyny alǵash ret kórip, kórermendermen kezdesýlerge qatysty. Onyń áseri erekshe boldy, – dedi spıkerler.
Mamandardyń aıtýynsha, ekrannan nebári 30 mınýt kórsetiletin fılmdi túsirýge shamamen 30 saǵat jumsalǵan. Operatorlar ár kadrdyń mazmun berýine erekshe mán bergen.
Aıta keteıik, 30 jyl buryn shaǵyn shyǵarmashylyq ujym retinde jumysyn bastaǵan QR Prezıdentiniń teleradıokesheni búginde birneshe baǵytty biriktiretin iri medıaqurylymǵa aınaldy. Onyń quramynda Kazinform halyqaralyq aqparat agenttigi, Jibek Joly, Silk Way, Silk Way Cinema telearnalary jáne «Jibek joly» radıosy bar.
