Prezıdent Teleradıokesheni Sankt-Peterbýrgte JI-di medıada qoldaný tájirıbesin tanystyrdy
ASTANA. KAZINFORM – Búgin Sankt-Peterbýrgte TMD-ǵa múshe memleketter aqparat agenttikteriniń basshylary keńesiniń (TMD aqparattyq keńesi) XXXIV otyrysy ótti.
Qatysýshylar zamanaýı medıa tehnologııalaryn, sonyń ishinde jasandy ıntellektti paıdalaný, sondaı-aq taratylatyn aqparattyń senimdiligin jáne BAQ jumysynda kásibı jáne etıkalyq standarttardy saqtaýdy qamtamasyz etý máselelerin talqylady.
Otyrysta sóz sóılegen QR Prezıdenti teleradıokesheniniń basqarýshy dırektory Robert Mýradıan Qazaqstan Memleket basshysy Qasym-Jomart Toqaevtyń 2026 jyldy Tsıfrlandyrý jáne jasandy ıntellekt jyly dep jarııalaǵanyn atap ótti. Quramyna telearnalar, aqparat agenttigi men radıo, TRKLAB dıdjıtal zerthanasy jáne Derekti fılmder ortalyǵy kiretin Prezıdent Teleradıokesheni kontent óndirisine JI quraldaryn belsendi túrde engizip keledi.
2025 jyly Jibek Joly arnasynyń efırine tsıfrlyq saýattylyq boıynsha onlaın sabaqtar telejobasy shyqty. Bul jobanyń barlyq 100 shyǵarylymy tek neırojeliler men generatıvti beıne bazasynda jasalǵan. JI kontent beınesin de, dýblıajyn da qazaq jáne orys tilderinde qamtamasyz etti.
Bıyl Jibek Joly taǵy bir áleýmettik mańyzdy jobany júzege asyrdy. Reseıdiń tanymal «Fıksıkı» anımatsııalyq mýltserıaly alǵash ret JI jasaǵan sýrdoaýdarmamen tolyq qamtamasyz etildi. Taǵy eki joba boıynsha jumystar júrgizilip jatyr, olardyń aýdıo jáne beıneqtaryn tolyǵymen neırojeliler qamtamasyz etedi. Neırojeliler sonymen qatar Derekti fılmder ortalyǵy men TRKLAB dıdjıtal zerthanasy jasaǵan muraǵat kontentin qalpyna keltirýge kómektesip jatyr.
R. Mýradıan sonymen qatar faktilerdi túpkilikti tekserý, materıaldardy redaktsııalyq baǵalaý, jýrnalıstik standarttardy saqtaý jáne jarııalaý jaýapkershiligi árqashan jýrnalıst nemese redaktorǵa júkteletinin atap ótti.
Kezdesýge qatysýshylar tsıfrlyq transformatsııa, JI algorıtmderin paıdalaný jáne TMD elderi medıa keńistiginde jalǵan aqparattyń taralýyna qarsy turý salasynda praktıkalyq tájirıbe almasýdyń mańyzdylyǵy týraly pikir almasty.
Talqylaý qorytyndylary boıynsha Dostastyq elderiniń memlekettik aqparat agenttikteri men medıa qurylymdary arasyndaǵy yntymaqtastyqty odan ári damytýǵa, birlesken jobalardy júzege asyrýǵa jáne kásibı baılanystardy tereńdetýge qyzyǵýshylyq rastaldy.
PHEF-2026 aıasynda ótkizilip otyrǵan TMD-ǵa múshe memleketter aqparat agenttikteri basshylary keńesiniń (TMD aqparattyq keńesi) XXXIV otyrysynyń jumysyna Ázerbaıjan, Belarýs, Qyrǵyzstan, Reseı, Tájikstan, Túrikmenstan jáne Ózbekstan BAQ ókilderi qatysty.
