Prezıdent teleradıokesheni sý tasqyny saldaryn joıý týraly «Sert» derekti fılmin ázirledi
ASTANA. KAZINFORM – Derekti fılmde Memleket basshysynyń óńirlerdi qalpyna keltirý jáne sý tasqynynan zardap shekken turǵyndarǵa kelgen zalaldy óteý jónindegi tapsyrmalarynyń oryndalýy baıandalady.
2024 jyldyń kókteminde Qazaqstan 80 jylda bolmaǵan eń iri tabıǵı apatty – kóktemgi sý tasqynyn bastan ótkerdi. Atyraý, Aqmola, Qostanaı, Soltústik Qazaqstan jáne Batys Qazaqstan oblystarynda ózenderge arnasynan tasyp, úlken shyǵyn ákeldi.
Memleket basshysy Qasym-Jomart Toqaev sol kezde zardap shekken birneshe óńirge baryp, oqıǵanyń aýqymyn jeke ózi baǵalady, qazaqstandyqtarǵa qoldaý kórsetip, Úkimet pen oblys basshylaryna birqatar naqty tapsyrma berdi.
Prezıdent halyqqa sert berdi jáne jaz ben kúzdiń 5 aıynda zardap shekken aýdandardy qalpyna keltirý jumystary, zalaldy óteý is-sharalary, úı salý men ınfraqurylymdy jóndeý jumystary jeke baqylaýynda bolatynyn aıtty.
Sý tasqyny kezinde QR Prezıdentiniń teleradıokesheni «Stıhııa» derekti fılmin túsirdi. Sodan beri 5 aı ótti. Prezıdenttiń Úkimetke bergen tapsyrmalary qanshalyqty oryndaldy, sý tasqynynan zardap shekken aýdandar qalaı qalpyna keltirildi, turǵyn úıden, múlikten jáne maldan aıyrylǵan turǵyndar máselesi tolyǵymen sheshildi me? Memleket basshysynyń elge bergen ýádesi oryndaldy ma? Osy suraqtarǵa jaýap retinde «Sert» derekti fılminde kórermenge sý tasqynynan zardap shekken Atyraý, Aqtóbe, Aqmola, Qostanaı, Soltústik Qazaqstan jáne Batys Qazaqstan oblystarynyń búgingi kelbeti usynylǵan.
