Prezıdent Teleradıokesheni soǵys ardageri Jaqan Seısebaevty ǵasyr jasymen quttyqtady
ALMATY. KAZINFORM — 10 naýryzda soǵys ardageri Jaqan Seısembaev óziniń 100 jyldyq mereıtoıyn atap ótedi.
Jyl sanap qatary sırep bara jatqan soǵys ardagerleri — tili bar tiri tarıhtyń naǵyz ózi. Solardyń biri — almatylyq Jaqan Seısebaev. Aqsaqal 10 naýryz kúni 100 jasqa tolady. Ekinshi dúnıejúzi soǵysynyń ardagerine týǵan kúni qarsańynda Prezıdent teleradıokesheniniń ujymy qurmet kórsetti.
Kazinform agenttigi basqarýshy dırektorynyń orynbasary — qazaq redaktsııasynyń bas redaktory Naǵashybek Aldan qart jaýyngerge shapan jaýyp, tátti toltyrylǵan sebet jáne shıpajaıǵa joldama tabystady.
Óz kezeginde ardager batasyn berip, soǵys jyldaryndaǵy estelikterimen bólisti.
Jaqan Seısebaev Belarýsti azat etý shaıqasyna qatysyp, úsh jerden jaraqat alǵan. Jeńis kúnin Kenıgsbergte qarsy aldy. Odan keıin sovet-japon soǵysyna qatysyp, elge 1948 jyly oralady.
— 17 jasymda soǵysqa attandym. Surapyl soǵysta bastan kóp oqıǵa ótti. 1942 jyly bizdi armııa qataryna aldy. Tórt aı boıy áskerı tehnıkany basqarýdy úıretti, ol kezde ártúrli artıllerııalyq qurylǵylar boldy. 1943 jyly 1 qańtarda belarýstik frontqa tústim. Biz reaktıvti artıllerııanyń BM-13 «Katıýsha» mashınasyn qoldandyq. 1943 jyly 12 naýryzda oń jaq jelkem men basymnan jaraqat aldym. Osy oqıǵadan keıin meni Máskeýge gospıtalge alyp bardy, — deıdi soǵys ardageri.
Ol Jeńis kúnin qalaı qarsy alǵanyn esine aldy.
— Jeńisti Kenıgsbergte (Shyǵys Prýssııa) qarsy aldym. 8 mamyr kúni Jeńiske jetkenimizdi estigen kezde bir jylap, bir kúlip, qushaqtasyp, jaýyngerler bir-birimizdi quttyqtadyq. Odan keıin Japon soǵysyna attandym. Ol aıaqtalǵan soń Soltústik Koreıaǵa soǵysqa attandym. Úsh soǵystan aman qaldym, — dedi ardager.
Urysta kórsetken jaýyngerlik erligi úshin Otan soǵysy ordeni, II dárejeli «Erligi úshin» medalimen nagradtalǵan.
— Erekshe qasıeti óte ashyq adam, eldiń barlyǵyna jaqsylyq jasaǵandy jaqsy kóredi. Bárine kómekteskisi kelip júredi. Eńbeqqor jan. Ákemiz soǵys jyldarynda basynan ótkergen oqıǵalardy qaǵazǵa túsirip qoıǵan. Aldaǵy ýaqytta sony kitap etip shyǵarǵymyz keledi, — deıdi qyzy Roza Seısebaeva.
Ardager ul-qyzdarynan 10 nemere, 20 shóberesi men 1 shópshek súıip otyr.
Buǵan deıin Prezıdent Teleradıokesheni soǵys ardageri Jaqan Seısebaevqa qurmet kórsetken bolatyn.