Prezıdent teleradıokesheni Ońtústik-Shyǵys Azııada medıa seriktestikti keńeıtedi

ASTANA. KAZINFORM — Bas dırektory Vý Vet Trang bastaǵan Vetnam aqparat agenttiginiń (VNA) delegatsııasy QR Prezıdenti Teleradıokesheniniń keńsesinde bolyp qaıtty.

Kezdesý barysynda taraptar eki eldiń buqaralyq aqparat quraldary arasyndaǵy kásibı baılanysty damytý perspektıvalaryn talqylady. Búgin qol qoıylǵan Aqparat salasyndaǵy yntymaqtastyq týraly kelisim aıasynda aqparattyq materıaldarmen almasý, kontentti birlesip shyǵarý, eldik medıa jobalardy júzege asyrý josparlanyp otyr. Sondaı-aq tájirıbe almasý jáne birlesken oqý baǵdarlamalaryn ótkizý múmkindikteri sóz boldy. 

QR Prezıdenti Teleradıokesheni — elimizdegi iri medıakompanııalardyń biri. Onyń quramyna respýblıkalyq Jibek Joly telearnasy men radıosy, Silk Way halyqaralyq telearnasy, Kazinform halyqaralyq aqparat agenttigi jáne Derekti kıno ortalyǵy kiredi.

Vetnam aqparat agenttigi (VNA) — Vetnam Sotsıalıstik Respýblıkasynyń resmı baspasóz organy bolyp sanalatyn ulttyq aqparat agenttigi. 1945 jylǵy 23 tamyzda qurylǵan, el úkimetine tikeleı baǵynady. VNA Vetnam men álemdegi saıası, ekonomıkalyq, áleýmettik, mádenı, ǵylymı jáne tehnologııalyq taqyryptarda aqparat taratady.

Aıta keteıik, búgin Astanada Qazaqstan Respýblıkasy men Vetnam Sotsıalıstik Respýblıkasy arasynda strategııalyq seriktestik ornatý týraly birlesken málimdeme jasaldy.