Prezıdent Teleradıokesheni men TRT medıa seriktestikti damytyp jatyr
ASTANA. KAZINFORM – Búgin Túrkııa Prezıdenti Rejep Taııp Erdoǵannyń Memleket basshysy Qasym-Jomart Toqaevtyń shaqyrýymen Qazaqstanǵa jasaǵan memlekettik sapary aıasynda Qazaqstan Respýblıkasy Prezıdentiniń Teleradıokesheni men Túrkııanyń Teleradıo korporatsııasy (TRT) ózara túsinistik týraly memorandýmǵa qol qoıdy.
Kásibı saladaǵy ekijaqty yntymaqtastyqty damytýǵa negiz bolǵan qujatqa eki el kóshbasshylarynyń qatysýymen QR Prezıdenti Teleradıokesheniniń dırektory Raýshan Qajybaeva jáne TRT bas dırektory, professor doktor Mehmet Zahıd Sobadjy qol qoıdy.
Qazaqstan men Túrkııanyń eń iri medıakompanııalary arasyndaǵy yntymaqtastyqtyń negizgi baǵyttary jańalyqtar almasý, birlesken kontent óndirý, mańyzdy oqıǵalardy jarııalaýda ózara qoldaý kórsetý, tájirıbe almasý jáne medıa óndirisindegi ozyq tájirıbelerdi engizý bolmaq.
Sonymen qatar Qazaqstan men Túrkııadaǵy oqıǵalar týraly jedel ári obektıvti aqparatqa qoljetimdilikti keńeıtý jáne aýdıtorııanyń habardarlyǵyn arttyrý — QR Prezıdenti Teleradıokesheni men TRT medıaresýrstarynyń birlesken jumysynyń basty basymdyǵy.
Túrkııanyń buqaralyq aqparat quraldarymen yntymaqtastyqty damytý — QR Prezıdenti Teleradıokesheniniń Taıaý Shyǵys pen túrki álemi elderindegi seriktestik jelisin keńeıtýge baǵyttalǵan keshendi strategııasynyń bir bóligi. Buǵan deıin osy baǵytta Al Jazeera, Jordan TV, Al-Mamlaka TV, QNA, AZERTADJ, Kabar, Hovar jáne basqa da medıakompanııalarmen uqsas kelisimderge qol qoıylǵan.
Anyqtama úshin:
QR Prezıdentiniń Teleradıokesheni — barlyq medıa platformada medıakontent óndirý men taratýdyń tolyq tsıklin júzege asyratyn Qazaqstandaǵy eń iri vertıkaldy ıntegratsııalanǵan medıakompanııa. Kompanııa quramyna qazaqstandyq aýdıtorııaǵa arnalǵan Jibek Joly telearnasy men radıosy, halyqaralyq Silk Way, Silk Way Cinema, Silk Way Prime arnalary, Kazinform halyqaralyq aqparat agenttigi, derekti kıno ortalyǵy jáne TRKLAB tsıfrlyq bólimshesi kiredi.
TRT — Túrkııadaǵy eń iri memlekettik medıaholdıng. Kompanııa quramyna 18 telearna men 17 radıostantsııa, sonyń ishinde halyqaralyq TRT World, TRT Avaz, TSR («Túrkııa úni»), orys, nemis, frantsýz jáne ıspan tilderindegi jańalyq portaldary, sondaı-aq Tabii serıaldyq OTT platformasy kiredi.
Aıta ketelik Qazaqstan men Túrkııa 14 qujatqa qol qoıǵan edi.
