Qazaqstan men Qyrǵyzstannyń iri medıaqurylymdary yntymaqtasýǵa kelisti

BІShKEK. KAZINFORM — Bishkektegi Qazaqstan Prezıdenti Qasym-Jomart Toqaevtyń Qyrǵyz Respýblıkasyna resmı sapary aıasynda Prezıdent Teleradıokesheni men Qyrǵyzstannyń Ulttyq teleradıokorporatsııasy ózara túsinistik pen yntymaqtastyq týraly Memorandýmǵa qol qoıdy, dep jazdy Kazinform agenttiginiń menshikti tilshisi.

Qujatqa qol qoıý rásimi Qazaqstan Prezıdenti Qasym-Jomart Toqaev pen Qyrǵyzstan Prezıdenti Sadyr Japarovtyń qatysýymen «Yntymak Ordo» rezıdentsııasynda ótti. Qujatqa Prezıdent Teleradıokesheniniń dırektory Raýshan Qajybaeva men Qyrǵyz Respýblıkasynyń Ulttyq teleradıokorporatsııasynyń Bas dırektory Bolotbek Tıllebaev qol qoıdy. 

Kelisim yntymaqtastyqtyń keń aýqymdy baǵyttaryn qamtıdy. Atap aıtqanda, taraptar medıakontent pen tájirıbe almasady, medıaholdıngter birlesip, kreatıvti jobalar jasaıdy.

Yntymaqtastyqtyń mańyzdy baǵyty - QR Prezıdentiniń TRK-nyń quramyna kiretin Silk Way telearnasymen seriktestikti damytý bolady. Telearna Ózbekstan, Tájikstan jáne Túrikmenstannyń aqparattyq uıymdary daıyndaǵan kontentti qazirdiń ózinde taratyp jatyr.

Aıta keteıik, Qazaqstan Prezıdentiniń Qyrǵyzstanǵa sapary «Ata beıit» ulttyq tarıhı-memorıaldyq keshenin aralaýdan bastaldy. 

Baǵdarlama aıasynda memleketter basshylary shaǵyn quramda kelissóz júrgizip, Joǵary memleketaralyq keńestiń jetinshi májilisine qatysty.