Prezıdent teleradıokesheni men Al Jazeera — strategııalyq yntymaqtastyqtyń úsh jyly
ASTANA. KAZINFORM — Qatar astanasy Doha qalasynda Qazaqstan Respýblıkasy Prezıdentiniń Teleradıokesheni basshylyǵy men álemdegi eń iri ári bedeldi medıakompanııalardyń biri — Al Jazeera Media Network ókilderiniń kezdesýi ótti.
QR Prezıdentiniń Teleradıokesheni dırektory Raýshan Qajybaeva men Al Jazeera Media Network-tyń bas dırektory Sheıh Nasser bın Feısal Ál Tanı yntymaqtastyqty tereńdetý jáne Al Jazeera-nyń óńirdegi qatysý aıasyn keńeıtý máselelerin jan-jaqty talqylady.
Qoldanystaǵy formattarmen qatar, Sheıh Nasser bın Feısal Ál Tanı arnanyń Qazaqstanda habar taratýyn uıymdastyrýǵa jáne búkil Ortalyq Azııa óńirindegi oqıǵalardy taratýǵa arnalǵan kásibı baza qurýǵa úlken qyzyǵýshylyq tanytty.
Sondaı-aq Al Jazeera óńir jýrnalısteriniń kásibı daǵdylaryn damytýǵa baǵyttalǵan, QR Prezıdentiniń Teleradıokesheni usynǵan eki kompanııa tájirıbesin ınstıtýtsıonalızatsııalaý jobalaryna aıryqsha qyzyǵýshylyq bildirdi. Taraptar dıalogty jalǵastyryp, osy bastamany 2026 jyly iske asyrý boıynsha praktıkalyq qadamdarǵa kóshýge ýaǵdalasty.
Al Jazeera Media Network bas dırektory Raýshan Qajybaevaǵa shaqyrǵany úshin alǵys aıtyp, jaqyn arada Qazaqstanǵa jumys saparymen jeke kelýge daıyn ekenin rastady.
Sonymen qatar Raýshan Qajybaeva Al Jazeera Media Institute dırektory Iman Ál Ámrımen kezdesti. 2024 jyly taraptar birlesip Maqsut Narikbayev University janyndaǵy halyqaralyq jýrnalıstıka mektebiniń stýdentteri men qazaqstandyq jýrnalısterge arnalǵan Qazaqstandaǵy alǵashqy «Al Jazeera aptalyǵyn» ótkizgen bolatyn.
Kezdesý barysynda Iman Ál Ámrı 2026 jyly ekinshi «Al Jazeera aptalyǵyn» ótkizý josparyn rastady jáne qazaqstandyq stýdentter men sala mamandaryna Al Jazeera-nyń kópjyldyq jýrnalıstik tájirıbesin jınaqtaǵan Medıa ınstıtýttyń avtorlyq kásibı ádebıetteriniń keń kitaphanasyna qoljetimdilik uıymdastyrýdy usyndy.
Eske sala keteıik, 2025 jyly Qazaqstan Prezıdenti Qasym-Jomart Toqaev Al Jazeera English telearnasyna eksklıýzıvti suhbat bergen bolatyn.
Aıta keteıik, QR Prezıdentiniń Teleradıokesheni — Qazaqstandaǵy eń iri medıakompanııalardyń biri. Ol kontentti jasaý, óńdeý jáne taratý jumystaryn tolyqtaı ózi atqarady jáne ony teledıdar, radıo, ınternet sııaqty barlyq platformalarda usynady.
Teleradıokeshenniń quramyna:
-
Jibek Joly respýblıkalyq telearnasy men radıosy,
-
Silk Way, Silk Way Cinema, Silk Way Prime halyqaralyq telearnalary,
-
«Kazinform» halyqaralyq aqparat agenttigi,
-
Derekti kıno ortalyǵy kiredi.
Al Jazeera telekompanııasy 1996 jyly Qatar ámiriniń jarlyǵymen qurylǵan. Kompanııa arab jáne aǵylshyn tilderinde álemniń kóptegen elderinde habar taratady, 50-den astam sheteldik bıýrosy bar. Derekti kontent Al Jazeera Documentary telearnasynda kórsetiledi.
Budan buryn Prezıdent TRK jýrnalısteri Al Jazeera medıa ınstıtýtynda taǵylymdamadan ótkenin jazǵan edik.