Prezıdent teleradıokesheni men Al Jazeera birlesken bilim berý jobalaryn damytady
ASTANA. KAZINFORM — Búgin «Qazaqstandaǵy Al Jazeera» jobasynyń ekinshi maýsymy aıasynda Prezıdent teleradıokesheniniń dırektory Raýshan Qajybaeva men Al Jazeera Media Network ókilderiniń kezdesýi ótti.
Qatardyń jetekshi medıa holdınginiń delegatsııasyn bas dırektor, koroldik áýlet ókili sheıh Nasser bın Feısal Ál Tanıdiń arnaıy tapsyrmasymen Al Jazeera Media Institute dırektory Iman Ál-Amrı bastap keldi.
Kezdesý barysynda Raýshan Qajybaeva men Iman Ál-Amrı Qazaqstan men Ortalyq Azııadaǵy medıa salasyna arnalǵan bilim berý bastamalaryn odan ári keńeıtý máselelerin talqylady.
Al Jazeera Media Institute dırektory Iman Ál-Amrı qazaqstandyq BAQ stýdentteri men kásibı mamandaryna arnalǵan dástúrli bilim berý baǵdarlamalaryn jańa bastamalarmen tolyqtyrýdy usyndy. Atap aıtqanda, Qazaqstandy Ortalyq Azııa men Ońtústik Kavkazdaǵy negizgi medıa ortalyqqa aınaldyrý maqsatynda birlesken «Talanttar zerthanasyn» qurý bastamasyn kóterdi.
Al Al Jazeera Plus tsıfrlyq platformasynyń dırektory Asıl Mansýr Qazaqstan týraly biregeı avtorlyq kontent ázirleıtin talantty ári kásibı kreatorlar qaýymdastyǵyn qalyptastyrýǵa baǵyttalǵan turaqty joba men arnaıy oqytý baǵdarlamasyn iske qosýdy usyndy.
Bul bastamalar aıasynda Qazaqstannyń mádenıetin, tarıhy men tabıǵatyn nasıhattaıtyn biregeı beınematerıaldar ázirlenip, Al Jazeera Plus platformasy arqyly álemdik aýdıtorııaǵa usynylmaq. Osylaısha, otandyq avtorlardyń jumystary halyqaralyq deńgeıde taralyp, Qazaqstannyń mádenı-tarıhı murasyn jahandyq aýdıtorııaǵa tanytýǵa múmkindik týady.
Óz kezeginde Al Jazeera Media Network-tiń aǵa prodıýseri Bashar Hamdan Al Jazeera Plus platformasy úshin túsirilgen tsıfrlyq jobalardy Al Jazeera 360 platformasy men medıaholdıngtiń telearnalaryna arnalǵan aýqymdy derekti kontentke aınaldyrýdy usyndy.
Sonymen qatar Bashar Hamdan Al Jazeera 360 platformasynda «Qazaqstanǵa ashylǵan tereze» atty arnaıy bólim qurý bastamasyn kóterdi. Onda avtorlyq materıaldarmen qatar Prezıdent teleradıokesheniniń úzdik derekti jobalary da jarııalanatyn bolady. Onyń pikirinshe, mundaı bólim keń aýdıtorııanyń qyzyǵýshylyǵyn týdyrady.
Prezıdent teleradıokesheniniń dırektory Raýshan Qajybaeva atalǵan bastamalardy júzege asyrý medıajeliniń óńirdegi turaqty qyzmetin jolǵa qoıýǵa jasalǵan alǵashqy mańyzdy qadam bolatynyn atap ótti.
— Bul bastamalar jýrnalıster qaýymdastyǵynyń kásibı quzyretin damytýǵa jáne jańa býyn kásibı mamandaryn qalyptastyrýǵa yqpal etedi, — dedi Raýshan Qajybaeva.
Eske sala keteıik, 2025 jylǵy jeltoqsanda Doha qalasynda Prezıdent teleradıokesheniniń dırektory Raýshan Qajybaeva men Al Jazeera Media Network bas dırektory sheıh Nasser bın Feısal Ál Tanı arasynda kezdesý ótken bolatyn. Sol kezde taraptar eki medıa uıym arasyndaǵy yntymaqtastyqty damytýdyń perspektıvalaryn talqylady.
Dohada ótken kezdesýde Al Jazeera telearnasyn Qazaqstanda taratý jáne búkil óńirdegi oqıǵalardy jarııalaýǵa arnalǵan kásibı baza qurý máselelerine qyzyǵýshylyq bildirilgen edi. 2026 jyly bul bastamalar naqty jobalardy iske asyrý kezeńine ótti.
Anyqtama:
Qazaqstan Respýblıkasy Prezıdentiniń teleradıokesheni — medıakontentti óndirý men taratýdyń barlyq kezeńin qamtıtyn, elimizdegi eń iri tiginen ıntegratsııalanǵan medıa kompanııa.
Kompanııanyń quramyna qazaqstandyq aýdıtorııaǵa arnalǵan Jibek Joly telearnasy men attas radıo, Silk Way, Silk Way Cinema jáne Silk Way Prime halyqaralyq telearnalary, «Kazinform» halyqaralyq aqparat agenttigi, Derekti kıno ortalyǵy jáne TRKLAB tsıfrlyq bólimshesi kiredi.
Al Jazeera telekompanııasy 1996 jyly Katar ámiriniń jarlyǵymen qurylǵan. Búginde telearna álemniń kóptegen elinde arab jáne aǵylshyn tilderinde habar taratady. Onyń shetelderde 50-den astam bıýrosy bar.
Derekti kontent Al Jazeera Documentary telearnasynyń efırinen kórsetiledi.
Eske sala keteıik, jaqynda Prezıdent Teleradıokesheni men koreıalyq Aju News Corporation Azııa keńistiginde biryńǵaı medıajeli qurýǵa kirisken bolatyn.
