Prezıdent Teleradıokesheni men aǵylshyn tilindegi eń kóne The Korea Times basylymy medıaseriktestikti damytýǵa ýaǵdalasty
ASTANA. KAZINFORM — Memleket basshysy Qasym-Jomart Toqaevtyń Koreıa Respýblıkasyna memlekettik sapary aıasynda búgin Prezıdent Teleradıokesheni men aǵylshyn tilindegi eń kóne The Korea Times basylymy arasynda memorandýmǵa qol qoıý rásimi ótti.
Aqparattyq jáne taldamalyq materıaldarmen turaqty túrde almasý, kontentti ózara ilgeriletý, sondaı-aq birlesken medıajobalardy júzege asyrý seriktestiktiń negizgi baǵyttary bolady.
Memorandým The Korea Times aýdıtorııasyna Qazaqstan týraly aqparatty tikeleı derekkózden alýǵa múmkindik berse, QR Prezıdenti Teleradıokesheniniń kórermenderi men oqyrmandary Ońtústik Koreıada men Azııa-Tynyq muhıty óńirindegi oqıǵalar týraly eksklıýzıvti taldamalyq materıaldarǵa qol jetkize alady.
Kezdesý barysynda Prezıdent Teleradıokesheni ókilderi TRK úshin bedeldi sheteldik medıamen turaqty ári ornyqty seriktestik baılanystaryn ornatýdyń mańyzdy ekenin atap ótti.
Prezıdent Teleradıokesheni men The Korea Times arasyndaǵy yntymaqtastyq tájirıbe almasýǵa, ózekti medıajobalardy ázirleýge jáne eki halyqtyń bir-biri týraly tereń túsinik qalyptastyrýǵa múmkindik beretin tıimdi alańǵa aınalady.
The Korea Times prezıdenti O En Chjınniń aıtýynsha, jańa ýaǵdalastyq Qazaqstan men Koreıa Respýblıkasy arasyndaǵy qarym-qatynastardy odan ári damytýǵa yqpal etetin praktıkalyq yntymaqtastyqtyń mańyzdy negizi bolmaq.
— Qazaqstan men Koreıa Respýblıkasy ekonomıkadan bastap mádenı-gýmanıtarlyq almasýlarǵa deıingi túrli baǵyttarda strategııalyq seriktestik qalyptastyryp keledi. Al búginde Qazaqstan-Koreıa baılanystaryn, sonyń ishinde medıa salasyndaǵy seriktestikti damytý úshin jańa perspektıvalar men úlken múmkindikter ashylyp otyr, — dep atap ótti O En Chjın.
Memorandýmǵa qol qoıý Prezıdent Teleradıokesheni qyzmetiniń halyqaralyq baǵytyn damytý jolyndaǵy kezekti qadamǵa aınaldy.
Aıta keteıik, qazirgi ýaqytta QR Prezıdenti Teleradıokesheniniń halyqaralyq seriktestik jelisine álemniń ártúrli óńirlerinen shamamen 70 sheteldik medıa qurylym kiredi. Olardyń qatarynda CMG, TASS, Al Jazeera, Yonhap, Kyodo, Jiji Press, Agenzia Nova, Anadolu Agency, ANI, Associated Press of Pakistan, BRIKS TV jáne basqa da BAQ-tar bar.
QR Prezıdentiniń Teleradıokesheni — barlyq medıajúıelerde medıakontent óndirý men taratýdyń tolyq tsıklin qamtıtyn Qazaqstandaǵy eń iri tik ıntegratsııalanǵan medıakompanııa. Kompanııa quramyna Jibek Joly telearnasy men Jibek Joly radıosy, Silk Way, Silk Way Cinema, Silk Way Prime halyqaralyq arnalary, Kazinform halyqaralyq aqparat agenttigi, Derekti kıno ortalyǵy jáne TRKLAB tsıfrlyq bólimshesi kiredi.
The Korea Times — 1950 jyly negizi qalanǵan jáne iri ulttyq HankookIlbo medıa tobynyń quramyna kiretin Koreıadaǵy aǵylshyn tilindegi eń kóne ári yqpaldy kúndelikti basylymdardyń biri. Basylym eldiń syrtqy álemmen baılanysyn qamtamasyz etetin negizgi aǵylshyntildi aqparattyq kópir retinde saıasat, ekonomıka, bıznes, halyqaralyq qatynastar jáne mádenıet taqyryptaryn tereńinen qamtýǵa mamandanǵan.
Buǵan deıin QR Prezıdentiniń Teleradıokesheni men Ońtústik Koreıanyń Aju News Corporation iri mýltımedııalyq jáne baspa kompanııasy yntymaqtastyq jáne ózara túsinistik týraly memorandýmǵa qol qoıǵan edi.
